Diyarname

Komeleya Nivîskarên Kurd li ser dardekirinên li Îranê daxuyaniyeke nivîskî weşand.
Vaye daxuyaniya komeleyê:

“Xwîn bi xwînê naye şuştin

Şenq û xwînê rawestînin!

Yên ku berê Qadî Mihemmed dan sêdarê û şeniqandin li Meydana Çarçira, yên ku bi bêbextî xweşmirov Qasimlo şehîd xistin, yên ku ji ‘Masîkê biçûk’ ê Samet Behrengî bizdiyan û ew dane kuştin, îro jî gewriya dersdar û çirokvebêjer Ferzad Kemanger, Elî Heyderiyan, Ferhad Wekîlî, Şirîn Elemhulî Atêşga û Mêhdî Îslamiyan dixin benê şimakirî, da çîrokên xwe nebêjin, da dengê xwe nikaribin bigihînin guhên jiyanê!

Her mirin li ser van axan; li Eyrana ariyan qîrîn û birqvedenake olanvedêr e!

Her mirina bi destê zaliman dibe nemirtiya rêwiyên li ser riya jiyaneke bi rûmet!

Her mirin dê veguhere nemirtiyê bi diruşma ‘Ferzad Kemanger nemir e’!

--Elî Heyderiyan nemir e!

--Ferhad Wekîlî nemir e!

--Şirîn Elemhulî nemir e!

--Mêhdî Îslamiyan nemir e!

Li gorî bîr û baweriya islamiyeta ku niha li ser navê Xweda desthilat e li Îranê, nîrxê herî giranbiha jiyîna mirov e!

Ev feraset jî vê hişmendiyê ji xwe re dike palpişt: ‘ canê ku Xweda daye, incex Xweda bistîne!

Lê; desthelata ser bi şaş, koma mellayên ji tirsa Xweda bêpahr, bi fitûyên xetsor kuştinê, şenqê, xwînrêjiyê helal dike!

Komeleya Nivîskarên Kurd, pêmayên desthelata Îmam Xumeynî vedixwîne rawestandin û dawi anîna li şenqkirinên li Îranê!”