Cemil Oguz

Lîstika Teatra Jiyana Nû (TJN) ya bi navê "Bêrû" di Festîvala Şanoyê ya Moskovayê de wekî lîstika herî serketî hat hilbijartin û bi Xelata Sereke hat xelatkirin. Derhênerê Lîstikê Nazmi Karaman dibêje, "Divê em hê pir bixebitin û lîstikên xwe bibin qada navneteweyî."

Li Moskovaya Rusyayê "Festîvala Pêşbaziya Şanoya Navneteweyî" ji bo bîranîna S.M.Şêpkîn tê lidar xistin. Şêpkîn bingeha dibistana şanoya Rusyayê daniye. Festîval îsal 17'emîn car ji bo minasebeta 230'yemîn rojbûna Şêpkîn hat li darxistin. Ji qada navneteweyî gelek lîstikên şanoyê hatin vexwendin û ew lîstik li Moskovayê hatin pêşkêş kirin. Yek ji wan jî lîstika Dariyo Fo "Bêrû" bû ku lîstikvanên TJN'ê yên Navenda Çanda Mezopotamyayê derxistibûn ser dikê. Wergera lîstikê ji bo kurdî Dilawer Zeraq kiriye û derhêneriya wê jî Nazmi Karaman. Ma li ser vê serketinê bi Karaman re xeber da.

Endaman piştî temaşekirina hemû lîstikan biryar daye
Lîstika ku par yekem car li Stenbolê derket ser dikê û îsal ligel Stenbolê li Amed, Batman, Wan û hin cihên din jî hat lîstin ku yek ji wan jî beşdariya di vê festîvalê de bû. Niha em guh didin derhênerê lîstikê Nazmî Karaman: "7'ê avrêlê em li Moskovayê bûn, li salonek 400 kesî me lîst, salon hema bêje tije bû. 5 endamên juriyê hatibûn temaşekirin. Bêyî wergera ji bo rusî me lîst, werger li cem endamên curiyê bû ji bo wan werdigerand, lê paşê endamên juriyê ji me re got 'me ew qas jê hez kir û em ketin navê ku piştî demek me hewce bi wergerê nedît, me temaşe kir'. Ew bi heman awayî çûne li lîstikên din jî temaşe kirine û piştî nîqaşan herî zêde ya me ecibandine û xelat kirine."

Yekem car em li pêşjuriyek dilîzin
Karaman dibêje ku heta niha wan li pêşberî gelek temaşevanan ev lîstika xwe lîstine û van lê zêde dike: "Yekem car bû me li pêşberî juriyek dilîst. Wan got gelek ecibandine û ji me re got ku ew ne li benda tiştek wisa bûn, texmîn nedikirin dê rastî tiştek wisa bên."

Endamên juriyê ji beşên cuda pêk hatin
Serokatiya juriyê Nikolay Aleksiyeviç Sliçenko dikir ku ew lîstikvana neteweyî û xwedî xelata dewletê ye. Endamên juriyê jî ji lîstikvan Vlado Velev, rexnegirê şanoyê Vladimir Yakovlev, nivîskar Yevgeny Malinin, zanyarê şanoyê Leyla Tastanova, rejîsor û dratamor Şalîko Bêkes û rejîsorê sînemayê Vera Fedorçenko pêkdihat. Derhêner Karaman dibêje endamên juriyê gelek şaş bûne ku lîstikek wisa komedî ya 18 kesî bi 6 kesî, ji dêvla dekorek mezin bi dekorek wisa sade û wisa serketî derxistine ser dikê û ev yek got: "Li vir li gelek bajaran temaşevanan ji lîstikê hez kiribû, li qada navneteweyî de ecibandineke wisa bo me gelek baş bû. Me li derve yekem car dilîst. Ev yek ji bo şanoya kurdî jî ji bo me jî gelek baş bû. Ev nîşan dide ku şanoya kurdî çiqas li cihek baş e, rexnegiran jî ev yek nîşan da. Ev xelat ji bo lîstikên ji niha û pêde bêne lîstin jî muhîm e; vê nîşan dide, divê em zêdetir li ser lîstikên xwe bixebitin û zêdetir li derveyî Tirkiyeyê nîşan bidin."

KUNYE:
BÊRÛ
Tekst: Dario Fo
Derhêner: Nazmî Karaman
Werger: Dilawer Zeraq
Lîstikvan: Rûgeş Kirici, Omer Şahin, Sakîne Jîr, Cîhad Ekîncî
Du perde