Amadekar: Lijneya Şêwrê ya Diyarnameyê
Nivîskar Zinarê Xamo di sala 1950 de li navçeya Wêranşar a  Rihayê hatiye dinê. Wî heta 30 saliya xwe jiyana xwe li wir derbas kir û dû re berê xwe da Swêdê. Ew jiyana xwe heta niha jî li Swêdê didomîne.

Pêlavçêkiriyê dike û dikeve nava siyasetê

Zinarê Xamo ji hêla pîşeyê xwe yê bingehîn ve pêlavçêker e û wî di destpêka salên 1970 de hem li Wêranşarê û hem jî li Stenbolê qonderîcîtî kiriye. Wekî gelek kurdên ku bi nivîsê ve mijûl in, wî jî wextekî di nava siyasetê de cih girtiye. Çîroka wî ya tevlîbûna siyasetê di sala 1973’yan de dest pê dike. Ew destpêkê di nava partiya Dr. Şivan de cih digire û heta van salên dawiyê jî di nava DDKD’ê de karê xwe yê siyasî dewam kir. 

Xwe bi xwe fêrî xwendin û nivîsandinê kiriye

Nivîskar Xamo ku kesên bi nivîs û xwendina kurdî ve eleqedar in ji nêz ve nas dikin, qet neçûye dibistanê. Wî xwe bi xwe fêrî xwendin û nivîsandinê kiriye. Balkêşiyeke wî ya din a vê derbarê de ew e ku wî dû re ji derve tevlî ezmûnan bûye û bi vî awayî dîplomaya dibistana seretayî û ya dibistana navîn bi dest xistiye. 

Rojnamegerî û serokatiya komelan kiriye

Çîroka wî ya weşandina nivîsên di rojnameyan de ji sala 1980 û pê de destpêdike. Digel karê endamtiya redaksiyon û redaktoriyê, gelek nivîsên wî di rojnameyên wekî Armanc, Berbang, Hêvî, Hêlîn û portala Netkurdê de derketine.

Zinarê Xamo digel karên siyasî, rojnamegerî û nivîskariyê, di nava xebatên komeleyan de jî bi awayekî aktîf cih girtiye. Wî salên 1980’yan de Serokatiya Federasyona Komeleyên Kurdistanê li Swêd û her wiha di sala 2014’ê de salekî Serokatiya Komeleya Nivîskarên Kurd li Swêdê kiriye.

Di bikaranîna înternetê çalak e

Xamo di salên dawî de bûye yek ji nivîskarên kurd ê ku serkêşiya bikaranîna înternetê wekî platforma weşandina nivîsan dike. Naskirina wî ya wekî blogerê kurdî yê destpêkê jî yek ji ispata vê yekê ye. Ji sala 2007’an û vir de blogeke wî ya bi navê “Hindik-Rindik” heye û ew rojane carnan heta 5 nivîsan tê de diweşîne. Piraniya nivîsên wî jî derbarê rûdanên rojane de ne. Heta niha wî bi giştî 3387 meqale nivîsîne û ev meqale di arşîva bloga wî de herdem dikarin werin xwendin. Ev 8 sal in ew bi awayekî aktîf medyaya civakî jî bikartîne û rojane di Facebookê de nivîsên ku bi giranî derbarê rojeva siyasî de ne diweşîne. Ev her du diyar de bûne sedem ku bikarhênerên înternetê yên bi kurdî dixwînin bi piranî navê Zinarê Xamo bihîstibin. Derbarê çalakbûna xwe ya di nava medyaya civakî de, ew wiha dibêje: “Ez gelekî girîngiyê didim medyaya civakî, ji ber meriv xwe digihîne her derê cîhanê, hemû sînoran derbas dike. Medyaya civakî ji fêrbûn û belavbûna kurdî re jî xizmeteke mezin dike.”

Dû deh saet kar re wextê xwe yê mayî dide nivîsandinê 
Zinarê Xamo niha 66 salî ye. Ew zewicî ye û çar zarokên wî yên bi navên Azad, Rûken, Serhat Arda û Rojen hene. Ev 36 sal in ku li Stockholm a paxtexta Swêdê dijî li daîreke dewletê dixebite. Derbarê jiyana xwe ya li Swêdê û zehmetiya mijûlbûna bi nivîsê re ew wiha dibêje: “Bi kurtî jiyana min ya Swêd pir monoton, feqîr û sînorkirî ye. Ji bo ku bikarim debara xwe ya şexsî bikim her roj 10 saetên min li kar û çûn û hatinê diçin. Û bi şev jî 2-3 saetan hin tiştan dixwînim û dinivîsînim.” Nivîskar Zinarê Xamo wê di dawiya meha rezbera îsal de teqawît bibe û çavê wî lê ye wê demê êdî bêhtir wext bide nivîsê û bi projeyên yên vê derbarê de mijûl bibe.

Pirtûkên Zinarê Xamo

Nivîskar Zinarê Xamo heta niha du pirtûk nivîsandine û pirtûkek jî ji Swêdî wergerandiye kurmancî: 

- Hindik-Rindik (pêkenîn) 

 - Antolojiya çîrokên zarokan

 - Wergera pitûka Susanna Tamaro ya bi navê "Bide dû dilê xwe" 

Blog: http://zinarexamo.blogspot.de/