AMED
Serlêdanên ji bo 2'emîn Festîvala Belgefîlmên Fîlmamedê ku ji aliyê Navenda Çanda Ciwanan a Cegerxwîn ve tê organîzekirin heta 27'ê avrêlê hatin dirêjkirin. Dîrektorê 2'yemîn Festîvala Fîlmamedê Îlham Bakir got ku ew dixwazin bi van belgefîlman dîroka sînemaya kurdan bikin belgeyên dîrokê.

Festîvala Belgefîlmên Filmamedê îsal di navbera 20-26'ê gulanê de li dar dikeve. Di festîvalê de dê gelek belgefîlm, xebatên atolyeyan û hin semîner li dar bikevin. Di serlêdana pêşbaziya belfîlman de pirzimanî esas tê girtin û dê fîlmên bi zimanê biyanî bi jêrnivîsa kurdî bêne nîşandayîn. Dîrektorê Fîlmamedê Îlham Bakir li ser xebat û armanca festîvalê axivî.

'Sînema û belgefîlm ji bo kurdan belgeya dîrokê ye'

Bakir, anî ziman ku festîvala wan rastî eleqeyek gelek mezin tê û wiha got: "Sîmemageriya Belgefîlman ji bo kurdan û sîmenagerên kurd qadek gelek girîng e. Ev xebat ji bo kurdan belgeya dîrokê ye. Em dixwazin ev qad bêtir pêş bikeve. Em vê yekê ji bo hemû gelê Mezopotamyayê difikirin. Em dixwazin bi vê xebatê çand, dîrok û nirxên gelên asûrî, ermenî, kurd, êzîdî, xiristiyan, elewî û yên din tevan nemir bikin. Em dixwazin hemû reng, nasname û baweriyan biparêzin."

Bakir got ku di pêşbaziya belgefîlman de dê 10 û 15 belgefîlm wekî fînalîst bimînin û wiha got: "Dê 5 xelat bên dayîn. Fîlmê herî baş dê xelata 5 hezar TL pere bigire. Xelatên taybet û jûrî jî hene. Xelata jûriyê ya gel jî heye. Em dixwazin gelê Amedê jî parçeyek vê festîvalê be. Dê 2 xelatên me yên bê berdêl jî hebin. Yek jê xelata Hunerê ya Cegerxwîn e, ya din jî xelata kamera ya Halîl Dag e."

Bakir, da zanîn ku festîval dê îsal bibe xelata piştgiriya projeyan û wiha got: "Kesên projeyên wan hebin dikarin serî li festîvalê bidin. Hemû belgefîlên ku hatine kişandin dê bên nirxandin. Ji bo projeyên hatine amadekirin dê piştgirî bê dayîn. Dê di nava projeyan de 10 proje bên hilbijartin û ji bo 3 projeyan 7 hezar TL dê piştgirî bê dayîn. Em dixwazin bi van projeyan, ziman, çand û nasnameyan bikin belge û nemir bikin."

Bakir, da zanîn ku dê derhênerên 3 belgefîlmên 5 rojan atolyeya fîlmên teoriya belgefîlman bê dayîn. Di semîneran de dê akademîsyenên Akademiya Aram Tîgran û Cegerxwînê beşdar bibin. Bakir got ku wan ji ber eleqeya zêde serîlêdan heta 27'ê avrêlê dirêj kiriye.

DÎHA