Diyarname
30'emîn Fûara Pirtûkan a Stenbolê TUYAP bi merasimekê dest pê kir. Di merasimê de Serokê Yekîtiya Weşangerên Tirkiyeyê (TYB) Metin Celal bal kişand ser girtina weşanger Ragip Zarokolu û ji hikumetê xwest Zagona Têkoşîna bi Terorê re (TMK) bê guhartin.

Fûara pirtûkan a herî mezin a Tirkiyeyê TUYAP'a Stenbolê îsal kete sala xwe ya 30'î. Fûar di heman demê de yekemîn car ji aliyê fûarên navneteweyî ve wekî Fûara Navneteweyî hate pejirandin. Fûar bi beşdariya Wezîrê Çandê yê Tirkiyeyê û Wezîrê Çandê yê Misrê, Kordînatorê Giştî yê Fûarê Deniz Kavukçuoglu, Serokê TYB'ê Metin Celal, mêvanê rûmetê yê îsal ê fûarê Ferit Edgu û gelek nivîskaran bi merasimekê vebû.
Serokê TYB'ê Metin Celal di axaftina xwe de qala yekemîn fûara ku di sala 82'yan de, di dema derbeyê de li dar ketibû kir û got: "Di sala 82'yan de yekemîn car me ev fûar li dar xist. Di TRT ku tekane televîzyon bû, di dema ku her weşan li ser çekan û derbeyê bû de qala vebûna fûarê jî hat kirin. Wê çaxê 28 weşanxane beşdar bû, 18 hezar kes hatinn serdana fûarê. Niha 30 sal temam bûne, 400 hezar kes xwendevan tên fûarê û niha fûara me li ser 80 hezar metrekareyê li dar dikeve dîsa cih teng e jêre. Wê çaxê weşangerî zor bû. Dewletê qeşanxane û çapxane ji hev venediqetand, niha gihîştiye vê fikrê. Digel van aliyên erênî aliyên neyînî jî hene. Pêşketinên ku pêşî li hunerê, fikir û ramanê digirin hene. Di sala 82'yan de yek ji beşdarî fûarê bû jî weşanger Ragip Zarakolu bû niha ew girtî ye."
Celal got ku Yekîtiya Weşangerên Dinyayê Zarakolu wekî leheng binav dike, diyar dike ku ji dêvla bê girtin divê xelata Nobelê bidinê, em wî tewqîf dikin. Zarokolu di sala 82'yan de jî dihat darizandin, niha jî."

Serokê TYB'ê Celal bal kişand ser TMK'ê ku çend xalên wî ji bo şiroveyê vekirî ne, di raporên Yekîtiya Ewropayê de jî bal dikişînin ser van xalên TMK'ê û wisa got: "Em ji hikumetê dixwazin ku vê zagonê biguherîne. Em hêvî dikin nivîskar û akademîsyenên ku girtîne sala bê em li vê derê bi hev re bin."

Piştî Celal, nivîskar Dogan Hizlan axivî û got: "Ez fûara pirtûkan wekî qada kifşkirinê dibînim. Nivîskar û pirtûka ku we qet nedîtiye hûn li vê derê dibînin. Ji bo vê yekê ez dibêjim qada kifşkirinê. Dema hûn li fûarê digerin derkevin keşfê, nivîskar û pirtûkên nû kişf bikin."

Mêvanê rûmetê yê fûarê Ferit Edgu jî di kurteaxaftina xwe de wisa got: "Îbnî Fararî gotiye 'Gerdûn pirtûk e'. Ez vê gotinê diguherînim û dibêjin 'pirtûk gerdûn e'. Tiştên ku ez afirandime pirtûk in. Ger ew nebana ezê di nav valahiyekê de bama."

Piştî axaftina fûar bi awayekî fermî dest pê kir û heta 20'ê mehê dê vekirî be. îsal li dor 600 weşanxane û saziyên sivîl beşdarî fûarê dibin ku di nav wan de nêzî 10 weşanxaneyên kurdan jî hene. Her wiha li dor 200 çalakiyên wekî panel û gotûbêj hene ku di nav wan de weşanxaneyên kurdan jî çend heban li dar dixin.

Ji Bakirkoy û Avcilara Stenbolê serwîsên fûarê hene ku mêvanan bê pere dibin fûarê. Yên ku ji Herêma Anatoliya Stenbolê bên jî dikarin metrobusê heta Avcilar bikar bînin û ji wir siwarê serwîsan bibin.
Fûar her roj nava hefteyê di navbera 10.00-19.00'an de, dawiya hefteyê jî di navbera 11.00-20.00'an de vekiriye. Tenê roja dawî ya fûarê (20'ê mehê) saet 19.00'an de tê girtin.