Merîwan

Navenda Çand û Hunera Vejîn îsal xelata kesayetiya salê ya Beriya Zêrîn da hunermanda kurd a ji Xorasanê Yelda Ebasî.

Li bajarê Merîwanê "Şeva Yelda" ji aliyê Navenda Çand û Hunera Vejîn ve rêûresmeke taybet hate pîrozkirin.

Ji Îlamê heta Makoyê, nivîskar, helbestvan û çalakvananên çandî û hunerî yên rojhilatê Kurdistanê jî di rêûresmê de amade bûn. 

Di rêûresmê de xelata salane ya Beriya Zêrîn a ku didin kesayetên hilbijartî yên rojhilatê Kurdistanê, îsal dan endezyar û stranbêja kurd a ji Xorasanê Yelda Ebasî.

Yelda Ebasî xelata xwe ji destê nivîskar û dîroknasê navdar ê kurdê Xorasanê Kelîmûllah Tewahûdî wergirt. 

Tewahûdî di dema dayîna xelatê de got: “Ev xelata gelê Kurdistanê berpirsiyariyeke mezin dixe ser milê vê hunermendê.”

Piştî wergirtina xelatê Yelda Ebasî jî ragihand ku ew dê zêdetir li ser pêşxistina kultur û hunera kurdî kar bike.

Di rêûresmê de her wiha xelata hevnîştimaniya salê ya bajarê Merîwanê dane çalakgerê jîngeparêz Şerîf Bacwer.

Navenda Vejîn 6 sal in xelata Beriya Zêrîn dide kesên ku roleke bihêz di pêşxistna çand û hunera kurdî de lîstine.