Diyarname

Komîsyona Venedîkê, Meşa Parêzeran, rewşa Demîrtaş, vane çend nûçeyên ku îro derketine pêş.

'Kayûmî ne li gor demokrasiyê ye'

Komîsyona Venedîkê ku girêdayî Konseya Ewropayê ye li ser kayûmên ku dest danîne ser şaredariyên kurdan daxuyanî weşand. Komîsyonê wisa got: "Şaredarên ku ji aliyê Wezareta Karên Hundir a Tirkiyeyê ve hatine girtin divê peywira wan bi paş ve bê dayîn, hurmet nîşanî biryara hilbijêran bê dayîn û rêyên din neyên qebûlkirin. Di vê çarçoveyê de li şaredariyên heyî divê destûr bê dayîn ku hilbijêr bikaribin şaredaran ji nû ve hilbijêrin, ji nû ve hilbijartin çêbibe."

AYM'ê Demîrtaş mafdar dît

Li Tirkiyeyê AYM'ê (Dadgeha Zagona Bingehîn) duh bi şev biryar da ku mafê siyasetmedar û hevserokê berê yê HDP'ê Selahattin Demîrtaş hatiye binpêkirin. Û dadgehê biryar da ku dewlet 50 hezar TL tazmînatê bide Demîrtaş. AYM'ê ji bo mebûsê CHP'ê Eren Erdem jî heman biryar da.

HDP: Demirtaş dîlekî siyasî ye

Lijneya Rêveberiya Navendî ya HDP'ê li ser biryara AYM'ê daxuyaniyeke nivîskî weşand û got: "Bi vê biryarê careke din diyar bû ku Demîrtaş dîlekî siyasî ye û ji aliyê desthilatdariyê ve hatiye girtin."

Baro dimeşin

Li Tirkiyeyê baroyan biryar dan ku her yek ji bajarê xwe ve ber bi Enqereyê ve bimeşe. Baroyan bi diruşma "Em ji bo darazeke xurt û serbixwe dimeşin" dest bi meşê kir. Baroyên Amed, Wan û yên bajarên din jî her yek ji bajarê xwe ve ber bi Enqereyê ve ket rê. Hikumeta Tirkiyeyê dixwaze alternatîfa baroyan ava bike, duh 80 baroyên Tirkiyeyê li hemberî vê yekê daxuyanî dabûn. 

Li Tirkiyeyê 80 baro piştgirî didin vê meşê. Parêzer dê 20 kîlometre bimeşin û paşê siwarê erebeyan bibin û herin Enqereyê. Tê hêvîkirin ku roja duşemê (22'yê mehê) parêzer bigihîjin Enqereyê.

5 sivîl hatin bombekirin

Balafirên şer ên dewleta Tirkiyeyê ku ev çend roj in bi ser çiyayên Başûr ve bombeyan dibarîne, di bomberana îro de 5 sivîl hatin kuştin. Di bombekirina pêr de jî pêşmergeyekî PDK'ê hatibû kuştin.