HENÎFE HISÊN

Herêma Rojhilata Navîn dema bi destê dagirkerên cîhanî û herêmî hat dîzaynkirin, paşê jî komara Sûriyeyê hate sazkirin. Kurdistan hat parçekirin û ev welat ji bo careke din qet nikaribe bibe yek û weke birîneke xedar hiştin da ku timî xwîn jê werê. Vesaziya erdnigarî û civakî li ser hîmê politîkayên parçe bike û bi rê ve bibe, dîsa bi politîkayên Erebkirin, Tirkkirin û Farskirinê hatin sazkirin. 

Ji hêla rejîma BAAS’ê ve Kembera Erebî li ser sînga welatê me hat danîn û di navbera herêmên kurdan, bajarok û gundewarên Rojava de li cihê ku Kurd, Turkmen û Ermenî lê dijîn, Ereb bi cih kirin.  Bi vê politîkayên xwe di nava van gelan de ruhê şovenîzmê bipêşxistin ku tu carî ji hevdû bawer nekin. Ji hêla din ve jî xwestin ku tu carî di navbera herêmên Rojava de yekbûneke erdnîgarî çênebe û statuyeke xweser li ser ava nebe. 

Bi rastî jî di dirêjaya dîroka kevin û nû de hêzên desthilatdar li ser navê Erebbûnê û ol an jî mezheban, bi hestên civakê lîstine, hestên wan bi rêxistin kirine û li dijî gelên din dane şerkirin. Piştî rejîma Baasê vê carê hêzên DAIŞ û El Nûsra li ser hestên gelên li van herêman lîstine û ew weke mertalên zindî ji bo politîkayên xwe bi kar anîne. Lê ji ber reseniya gelên li herêmê, wan xwestiye bi wijdan û aqilê xwe yê civakî bi gelên bi wan re di nava aramî û li hevkirinê de bin. Niha ev herêm, bi taybetî Efrîn, Kobanê yanî ji Ezazê heta Cerablusê weke herêmeke bi aloz di navbera grûbên çete, dewleta Tirkiyeyê, rejîmê, Îran Rûsya û hêzên me ên Sûriyeya demokratîk de bûye herêmek bi aloz. 

Hemû hêz dixwazin xwe li vir bikin hêz û li ser vê hrêmê polîtîka û bazaran dikin. Dema em bipirsin çima ev hêz ewqas giranî didin ser vê herêmê? Bersiva wê ev e, ji ber naxwazin hêzên QSD li ser vê herêmê serweriya xwe ava bikin. Ji ber dema ev herêm bikeve bin serweriya QSD, wê li wir projeya siyasî ya federasyona demokratîk ya Rojava- bakurê Sûriyeyê jiyanî bibe. Ev tê wateya bi destxistina stetuya xwe ya siyasî ku şêwazê rejîma navendî ji holê radibe û pergalek demokratîk û ne navendî li Sûriyeyê pêk tê. Ji bo wê hêzên herêmî û cîhanî vê yekê naxwazin û li vê herêmê her tim aloziyê ava dikin û kirine meydana şer. 

Di vî warî de hêzên koalîsyonê ku Tirkiyeyê weke mutefîkê xwe yê NATO´yê dibînin, naxwazin wê bi awayekî rasterast bigirin hemberî xwe. Ji bo vê jî grûbên girêdayî xwe li van herêman bi cih kirine û parastina wir a hewayî jî daye Tirkiyeyê. Lê ev grûb 3 sal in herêma Efrîn, Şehba û Helebê xistine bin çembereke giran û çavên wan li dagirkirinê ye. Di vê demê e ku hêzên QSD’ê berê xwe dane pêngava Reqa, hemû hêzên navbirî ketine nava tevgerê û careke din dixwazin serweriya xwe ava bikin ku QSD nikaribe xwe bigihînê Efrîn û Şehba. Lê niha ji her kesî bêhtir DAIŞ û rejîm ji vê politîkayê sûdê werdigirin û berê xwe dane van herêman.

Niha DAIŞ nêzî Ezazê bûye. Ev tê wateya gihîştina sînorê Efrîn û rasterast bi hêzên me yên Efrînê re bikevin nava şer. Wê demê Efrîn û Şehba di çemberê de ne, wê destek ji wan re neyê dayîn ji ber ku navbera me qut e. Bêguman hêzên me yên QSD´ê wê çavên xwe li vê yekê negirin û wê berê xwe bidin Efrînê. Ev hem maf e, hem jî erk e. Wê demê hemû kevir wê ji cihê xwe bileqin, wê demê azadiya bakurê Sûriyeyê wê misoger bibe. Bi vî rengî alozî wê ji holê rabe. Bila kes ji vê netirsê û ne bi guman be. Ev yek ji bo em bi hevdu re bijîn û bi dewletên cîran re jî polîtîkayek dostane bijîn e.

jindasilan@gmail.com

30.05.2016, Yeni Ozgur Polîtîka