Diyarname
Fawaz Husên ku demek berê "Barê Şevê" derxistibû vê carê bi wergera "Biyanî" ya Albert Camus ket rojevê. Husên li her du pirtûkan 26'ê mehê li Fûara Pirtûkan a Amedê ye.

“Biyanî“ tê xwendin

Yek ji klasîkên modern, mînaka girîng a edebiyata eksistansiyalist romana Albert Camus, “Biyanî“ ji Weşanên Avestayê derket. Pirtûk ji aliyê Fawaz Husên ve ji fransî ji bo kurdî hatiye wergerandin.

Kitêba Biyanî li dora fikir û ramana absurd û pelepûciyê çerx dibe. Beşa pêşî ji dîtinên felsefî yên Albert Camus pêk tê. Lehengê romanê jiyanek bê mane, bê wate dijî û di bajarê xwe de, di mala xwe de, bi diya xwe û bi dostika xwe re, xerîb û biyanî ye. Di wateya pêwendiyên bi derve re nagihîje û valahiyeke mezin di can û giyanê wî de peyda dibe. Lehengê romanê dinyayê bê wate dibîne lê ji vê bêwatebûnê nareve, li mirinê an li xwekuştinê nagere. Hêviya tu bihuştê û tirsa tu xwedayî nêzîkî dilê wî nabe û heta roja dawîn ji temenê xwe, ji wê pelepûçiyê hez dike û bê bawerî li bendî kêliya xwe ya dawîn dimîne.

Nivîskar Albert Camus ku di sala 1913'yan de hatibû dinê û di sala 1960'î de di encama qezayekê trafîkê de jiyana xwe ji dest da, xwediyê Xelata Nobelê (1957) bû.

Rojnameya Le Monde di sala 1999'an de li ser pirtûkên sedsala 20'an lîsteyeke amade kir. Ji bo vê pirsa "Kîjan pirtûkê di bîra we de bandoreke mayînde çêkir?" kir û 17 hezar fransizî deng da. Di encamê de "100 pirtûkên sedsalê" hatin hilbijartin û "Biyani"ya Camus di rêza pêşîn a vê lîsteyê de cih girt.

"Biyani"ya Camus ku pêşî di sala 1942'yan de hatibû çapkirin û heta niha li gelek zimanan hatibû wergerandin niha bi wergera Husên li ber destê xwendevanên kurd e.

Fawaz Husên ku ev pirtûk wergerandiye, kurtedemek berê romana wî bi navê "Barê Şevê" ji Weşanên Avestayê derketibû. Husên, li Fûara Pirtûkan a Amedê roja 26'ê mehê saet 15.30-16.15'an de di bin sernavê "Fawaz Husên: Giyanekî kurdî di bedenekî fransî de" gotûbêjeke pêşkêşî temaşevanan dike.

Biyanî / Albert Camus / Wergera ji fransî: Fawaz Husên / Roman / 160 rûpel

Nûçeyên eleqedar:

- Fawaz Husên diçe Batman, Mêrdîn û Amedê

- Fawaz Husên dibe mêvanê Amedê

Nûçeyên eleqedarê Fûara Amedê:

- Li Fûara Amedê çalakiyên 25'ê mehê

- Li Fûara Amedê roja 24'ê mehê

- Di Fûara Pirtûkan a Amedê de îro

- Nivîskarên kurd pirtûkên xwe îmze dikin

- Bername û beşdarên Fûara Pirtûkan a Amedê