DiyarName.Com

Diyarname
Ji her çar parçeyan zêdetirî 30 nûnerên partî û saziyan, li ser Rojava li Brukselê civiyan. Civîn li navenda Kongreya Neteweyî ya Kurdistanê (KNK) pêk hat. Û biryar hat girtin "Roja 1'ê Reşemî wekî Rojava Rojava ya Dinyayê" hat qebûlkirin û ji bo vê yekê li hemû dinyayê wê rojê wê çalakî bêne li dar xistin. Her wiha biryar girtin ku di bin banê KNK'ê de bi beşdariya hemû nûnerên partiyan komîteya dîplomasiyê ji bo Rojava bê avakirin.
Va ne hin axaftinên beşdaran:

'RIHEKÎ MEZIN Ê YEKBÛNÊ DERKET HOLÊ'
- Hevserokê KNK’ê Ahmet Karamus: Wekî gel em di pêvajoyeke krîtîk de ne. Niha li ser destkeftiyên kurdan planên mezin ên navneteweyî hene. Ev plan tenê bi Rojava re sînordar nîn in; planek e ku hemû Kurdistanê digire nav xwe. Li Rojhilata Navîn demaveke nû dest pê kiriye. Pêşbîniyên ku berê hatibûn kirin serûbin bûn. Ezberên kevin xera bûn. Pêwîst e em jî vê yekê bibînin.
- Dewleta Tirk bi piştevaniya dewletên navneteweyî û bi taybetî bi hêzên Şamê re, ji bo ji navbirina destkeftiyên kurdan di nav hewildanekê de ye. Armanca dijminên me ew e ku li her çar parçeyan destkeftiyên kurdan tune bikin û ji holê rakin. Ji bo vê xetereyeke mezin heye. Lewma divê em wekî hemû partiyên kurd îdeolojî û nêrînên partîvaniyê bidin aliyekî û bi perspektîfeke nû ya ku berjewendiyên gelê me esas digire nêzî mijarê bibin. Divê hemû xebat û hewildana me parastina nirx û destkeftiyên gelê me be.
- Li dijî êrîşên pêk tên di nav gelê kurd de rihekî mezin ê yekbûnê derketiye holê. Wekî gel em bi hêvî ne. Ji ber ku gelê kurd di nav yekîtiya rih de ye û li dijî êrîşan bertekên cidî nîşan dide. Ya dikeve ser milê me jî ew e ku em bersivê bidin daxwazên gel, yekîtiya xwe ava bikin û li dijî vê yekê rawestin.

'GERE EM RAYA GIŞTÎ Û MEDYAYA EWROPAYÊ HESTIYAR BIKIN'

- Li ser navê Tevgera GORAN Mîran Salih: Ewlehiya Rojava û pergala wê, ewlehiya hemû Sûriyeyê ye. Êrîş, êrîşeke li ser herêmê ye. Li dijî mafên gelê me ye. Divê bi tundî li dijî vê were rawestin. Li Ewropayê bertekeke cidî ya gel heye, hinekî jî xebatên dîplomatîk hene. Lê ev têrê nake. Bi taybetî divê em raya giştî û medyaya Ewropayê di vê mijarê de hestiyar bikin.”

- Serokê Partiya Îslamiya Kurdistanê Hikmet Serbilind: Dewleta Tirk li pişt êrîşên li ser Rojava ye. Rejîmên Rojhilata Navîn dixwazin kurdan bifetisînin. Welatên Misilman di vê mijarê de bêdeng in, mîna ku tiştên diqewimin dipejirînin. Pêwîst e em van bibînin. Wekî gel, divê em li dijî çete û rejîmên dîktator parastina xwe ya rewa bikin.

- Nûnerê Rêxistina Rojava Xwebûn Evdilbaqî Yusif: Îro roja yekîtiya li dijî êrîşan e. Divê em hemû bi hev re wekî yek deng li ber xwe bidin.

- Tevgera Azadî-Rojava Şêx Ehmed: Wekî gel yekîtî hatiye avakirin lê di navbera partiyan de belavbûnek heye. Tiştên diqewimin bila rêveberiya Rojava bi partiyan re parve bike.

- Li ser navê Komala Hizba Komûnîst Ehmet Salihî "banga hestiyariyê" kir. Li ser navê Partiya Çep Mehmud Rojava jî destnîşan kir ku ji bo kurdan roja yekîtiyê ye. Nûnerê Partiya Demokrat a Kurd li Sûriyeyê Bavê Narîn jî tekez kir ku divê hemû partî li her derê cîhanê ji bo Rojava bixebitin.

DIVÊ GIRANİYÊ BIDIN DÎPLOMASIYÊ

- Dîplomatê berê Wurya Qeredaxî: Gelê me li çar parçeyan û li gelek navendên cîhanê li ser piyan e û çalakiyan dike. Ji bo Rojava dengekî bilind derdixe. Di nav kurdan de hestiyariya yekîtiyê ava bûye. Ev tiştên erênî û xweşik in lê kêm in. Xebatên me yên dîplomatîk li nezdî dewletan û bi taybetî li NY’yê (Neteweyên Yekbûyî) kêm in. Ji bo em van kêmasiyan ji holê rakin divê em xebatên dîplomatîk bilez bikin. Ji bo vê divê em hemû derfetên xwe seferber bikin.’’

'BAŞÛRÊ KURDISTANÊ JÎ DI NAV HEDEFÊ DE YE'

- Endamê Konseya Rêveber a KCK’ê Zubeyir Aydar: Heke em îro Rojava neparêzin, wê sibê an roja din dor bê ser Başûrê Kurdistanê jî. Pêwîst e em vê bibînin.’

- Hevserokê KONGRA-GEL Remzî Kartal: Li ser Rojava planeke navneteweyî heye. Armanc û plan ew e ku di navbera gel û baweriyên herêmê de şerekî bidin destpêkirin. Dixwazin herêmê bikin dojehê. Li vir kurd dê zirarek mezin bibînin. Lewma divê em bibin yek deng. Gelê me vê diqîre, divê em jî bibin dengê wan. Şoreşa Rojava li cîhanê dengekî mezin veda û sempatiyek mezin ava kir. Tenê armanca me ew e ku em vê hîn zêdetir belav bikin.Li dijî Kurdan biryara Enfalê hatiye girtin. Piştî Iraqê, dixwazin ya duyemîn li Sûriyeyê pêk bînin. Ev biryar ne li Şamê, li Parîsê hatiye girtin. Werin em binêrin ka em ê çawa vê bi ser bixin.

WEKÎ PARTIYA PDK-Î EM LI GEL ROJAVA NE

- Li ser navê Partiya Demokrat a Kurdistanê (PDK-Î) Baha Îbrahîmî: Wekî partî em li gel gelê xwe yê Rojava ne. Em ne tenê piştgir in, di her warî de alî ne. Çi erk bikeve ser milê partiya me, em amade ne. Îro Rojava ye, sibê Rojhilat e. Ji bo me ferq nake. Divê em li dijî van êrîşan bibin yek deng.

- Li ser navê PYD’ê Mizgîn Ehmed: Parastina Rojava parastina Kurdistanê ye. Li kolanan, di dîplomasiyê de, li ku derê be bila bibe, divê em bi yek dengî û bi hestiyarî destkeftiyên kurdan biparêzin. Heke em bibin yek, tenê wê çaxê şansê me yê serkeftinê heye. Banga me ew e li dora Rojava bibin yek.

- Li ser navê YNK’ê jî Şêx Şemal: Hikûmeta demkî ya Şamê li ser gelê me terorê dimeşîne. Dixwazin destkeftiyên ku gelê me bi dest xistine ji holê rakin. Divê em li dijî vê derkevin. Îro li Başûrê Kurdistanê, Ewropa û Bakurê Kurdistanê gelê me li ser piyan e. Divê em jî bibin bersiva gelê xwe.

Hin nûçeyên eleqedar:

- Mazlum Ebdî: Hevdîtin didomin, Artêş wê nekeve Herêmên Kurdan

- 25'ê mehê, agahiyên li ser Rojava

- Şaredariyên DEM Partî: Ji bo Rojava em hemû derfetên xwe seferber dikin

-- 24'ê mehê, agahiyên li ser Rojava

- Heyva Sor a Kurd ji bo rakirina dorpêça li ser Kobanî banga lezgîn kir

- Koma Berxwedan bi stran û peyaman piştgiriyê dide Rojava

-- 23'yê mehê agahiyên li ser Rojava

- 70 rexistinên li Ewropayê banga piştgiriya ji bo Rojava kir

-- 22'yê mehê agahiyên li ser Rojava yên derketine pêş...

- Heyetê li Rojava daxuyanî da: Divê her kes tevli berxwedana Rojava bibe

-- 21'ê mehê, nûçeyên li ser Rojava…

- Hevserokê DBP'ê Bayindir li Rojava axivî: Bila heyetên ji dinyayê jî bên vir