Diyarname
Şaredariya Erxeniya Amedê xebateke nû da dest pê kirin: Rojên Pirtûkan. 4 rojan wê pirtûk li Erxeneyê li pêşberî xwendevanan bin.

Şaredariya Erxenî bi navê 1'emîn Rojên Pirtûkan a Erxeniyê xebateke nû da dest pê kirin û îro ev bi merasimek dest pê kir. Rojên Pirtûkan heta 5'ê mehê dê bidome.

Di merasima destpêkirina Rojên Pirtûkan a Erxenî de  Hevşaredarên Bajarê Mezin a Amedê Serra Bucak û Dogan Hatun, Hevşaredarên Erxeniyê Şiyar Guldiken û Birsen Azak Bayar, Hevşaredara Peyasê Bêrîvan Gulşen Sîncar, Hevserokê DEM Partî ya Amedê Abbas Şahin, weşanger û nivîskar amede bûn.

Di merasimê de Hevşaredara Amedê Bucak sipasiya kesên ked dane kir û got, "Ji dema ku em hatine hilbijartin ve pêşketinek çêbûye. Lê ez dizanim ku bi vê biharê re şaredariyên me yên navçeyan jî dê cih bidin çalakiyên çand û hunerê yên bi vî rengî û dê nîşan bidin ku ev yek di navendên me yên navçeyan de jî gengaz e."
Bucak pêvajoya siyasî ku didome bibîr xist û got, ku ew jî wekî rêveberên herêmî di vê pêvajoya civakî de çalakiyên civakî û her wiha çalakiyên çand, huner û ziman ên ku dê bên lidarxistin wekî parçeyek çareseriya demokratîk û lihevkirina civakî dibînin.

Fûar bi hevkariya Şaredariya Erxenî û YEWKURD'ê (Yekîtiya Weşangerên Kurd) li dar dikeve. Li ser navê YEWKURD'ê jî weşanger Jêhat Rojhilat jî axivî û sipasî kesên piştgirî dane vê xebatê kir.

Piştî axaftinan çalakiyan dest pê kir. Di çarçoveya bernameyên îro de, bi beşdariya Bilal Zilan û Mehmet Şah Aslan paneleke bi navê "Reşa Zimanê Zazakî", bi beşdariya Şehmus Diken jî paneleke bi navê "Şehrin Dilinden, Kelamindan" (Ji zimanê bajêr, ji kelama wê) li dar ket. Her wiha bi beşdariya Muslum Uzulmez jî bi navê "Dunden bugune Ergani Ve Erganinin Kimligi" (Ji duh heta îro Erxenî û nasnameya Erxenî) gotûbêjek li dar ket.