NAVENDA NÛÇEYAN
Yekem stranbêja jin a kurd li rojhilatê Kurdistanê hunermend Fetane Welîdî ku di salên 1970’an de wekî jineke serhildêr dest bi karê hunerê kir û wekî yek ji stêrên herî geş di huner û muzîka kurdî de derket pêş, koça dawî kir.
Medyaya rojhilatê Kurdistanê ragihand ku hunermenda mezin jina kurd Fetane Welîdî di 71 saliya xwe de ji ber nexweşiyê canê xwe ji dest daye.
BAVÊ WÊ Û HESEN KAMKAR ALÎKARÎ KIR
Fetane Welîdî di sala 1953’an de li bajarê Sine yê rojhilatê Kurdistanê di nava malbatek hunerî de hatiye dinê. Li Dibistana Bilind a Muzîkê ya li Tehranê xwendiye. Fetane di salên 1970’an de bi rêya bavê xwe Mihemed Şerîf Welîdî û bavê endamên Koma Kamkaran Hesen Kamkar cîhana muzîkê naskiribû.Bavê Fetane Welîdî hem li kemançeyê dida, hem jî dengbêjekî serdema xwe bû. Her wiha yekem teşwîqkerê ku Fetane bi cîhana huner û muzîkê daye naskirin bû.
LI RADYOYA SINE Û KIRMAŞANÊ
Di pêvajoyek rejîma Îranê dengê jinan qedexe kir û dilê her kesê dixwest li nava koman dengê jinan jî hebe, Fetane derketiye. Wê di nava komên muzîkê de bi cilên kurdî û kofiya sineyî straye. Dengxweşa rojhilatî bi demê re tevli gelek bernameyên radyo û TV'yan bûye û bi zimanê kurdî ji kûrahiya dil gotiye. Her çend kariyera Fetane Welîdî demek kurt bû jî, lê wê zêdetirî 56 stran li radyoyên Sine û Kirmaşanê qeyd kiriye. Li gelek deverên rojhilatê Kurdistan û Îranê dengê wê yê zelal hatiye guhdarîkirin. Fetane Welîdî hezkirina welatê xwe bi dengbêjiyê aniye ziman ku çiqasî bi welatê xwe ve girêdayî ye.
Heta niha tenê albumeke wê li ber dest e.
Rojnews