Diyarname

Li Fûara Pirtûkan a Îzmîrê îro polîsan bi ser standa Pirtûka Kurdî de girt, dest danîn ser 3 pirtûkan û xebatkarê wan Sebih Yoldaş jî girtin bin çavan.

Fûara Pirtûkan a Îzmîrê "Îzkîtap Fest" 19'ê mehê dest pê kir. Fûar heta 28'ê mehê li Kulturparta Konaka Îzmîrê vekiriye. Ji saziyên kurdan Nûbihar, Na, Pirtûka Kurdî û Weqfa Îsmaîl Beşîkçî li fûarê stand vekirine.

Polîs îro hatine ser standa Pirtûka Kurdî û hin pirtûk desteser kirine. Xwediyê Pirtûka Kurdî Bawer Berşev li ser meseleyê ev agahî dan me, "Îro serê sibê polîs hatina gotine 'gilî heye, hûn pirtûkên qedexe difroşin' û yek bi yek li pirtûkan mêze kirine. Pirtûkek ku derbarê wê de 'biryara berhevkirinê' hebû girtine. Me gotiye haya me ji biryarek wisa tune ye, heba me yê rakira. Polîsan yek bi yek li pirtûkan mêze kirine, xwendine, fotoyên wan kişandine û çûne."

Berşev dibêje piştî vê meseleyê, vê carê êvarkî hatine û  wisa dibêje, "Vê carê dest danîne ser sê pirtûkên ku di sernavê wan de peyva Kurdistan hebûye. Ligel van pirtûkan xebatkarê me Sebih Yoldaş jî girtine bin çavan."

Li gor gotina Berşev parêzer niha li ser dixebitin û îhtîmal heye piştî îfadegirtinê berdin lê hê di bin çavan de ye.

Pirtûkên ku polîsan dest danîne ser ev in: "Kurdistan 1919-1920" (Amadekar Seîd Veroj), "Kurdistan Fedaisi Muşlu Hilmi Yildirim" (Amadekar Sedat Ulugana) û "Sovyetlerin Oyunlari Karşisinda Kurdistan Hukumeti" (Amadekar Newşîrwan Mistefa Emîn). 

***

Not: Piştî çend saetên binçavkirinê Sebih Yoldaş hat berdan. (Ev not paşê li nûçeyê hatiye zêdekirin) 

***

Nûçeyên Eleqedar:

- Nivîskarên kurd pirtûkên xwe îmze dikin 

- 4 saziyên kurdî beşdarî ÎZKÎTAP'ê dibin