ENQERE
Parêzvanên mafên mirovan, siyasetmedar û hindekaran, piştîgirî dan Hevserokê BDP'ê Selahattîn Demîrtaş ku bi daxwaznameyekê xwest keça wî Delal Demîrtaş "Sonda Me (Andimiz)" nexwîne. Parêzvanên mafên mirovan gotin ku divê ev sond bê rakirin.

Piştî ku Hevserokê BDP'ê Selahattîn Demîrtaş daxwaznameyek da Midûriyeta Perwerdeya Neteweyî û da zanîn ku, êdî keça wî Delal Demîrtaş dê tevlî xwendina "sonda me" ya her roj serê sibê li dibistanan tê xwendin nebe, nîqaşên di mijara rakirina "sondê" de, dîsa hatin rojevê.
Serokê Giştî yê MAZLUMDER'ê Ahmet Faruk Unsal yê ku di sala 2009'an de ji bo "sonda me" bê rakirin kampanyaya "Ez ne tirk im, mirov im" daye destpêkirin, diyar kir ku nîqaşên tên kirin, erênî ne. Unsal wiha got: "Ev 2 sal in em vê xebatê bi kampanyayê dikin. Gelek kes ji ber vê yekê gilî dikin. Li gel xebatên me, israra ranekirinê, didome."
Unsal bibîr xist ku pêkutiya tê kirin, bandorê li derûniya zarokan dike û wiha axivî: "Divê zarokên me ne ji bo nîjada tirk û ne jî tu nîjadên din sonda xwe fêdakirinê nexwînin. Divê zarokên me ji qalibên bîrdoziyan derkevin."

EGÎTÎM SEN: DIVÊ DEST JI PÊKÛTIYA YEKPARE BÊ BERDAN

Sekreterê Giştî yê Egîtîm Sen'ê Mehmet Bozgeyîk diyar kir ku, nîqaşên li ser vê mijarê, berê jî hatin kirin û bi bîr xist ku dema Wezîra Perwerdeya Neteweyî Nîmet Çubukçu hatiye ser kar, gotiye ku dikarin li ser vê mijarê nîqaşan bikin. Bozgeyîk, diyar kir ku sondên wekî "sonda me", li tu welatên cîhanê tune ne û wiha got: "Ev pêkutî ramana kesên desthilatdar îfade dike. 'Sonda me', li welatên ku lê gelek nasname hene, nirxa hevpar ya hemû kesan nîn e. Divê demildest dev ji vê pêkutiyê bê berdan."

HAS PARTÎ: EV DI LEŞKERIYÊ DE HEYE Û ŞAŞ E

Alîkarê Serokê Giştî yê HAS Partiyê Mehmet Bekaroglu jî diyar kir divê "sonda me" bê rakirin. Bekaroglu, bal kişand ser naveroka "sonda me" ya ku cudahî di nav de heye û wiha got: "Îtîraza min, li hemberî naveroka metnê ye. Lê ya ji vê girîngtir ew e ku zarok bi vê sondê dest bi perwerdehiyê dikin. Naveroka wê cuda jî bikin, dema zarok bi sondê dest bi perwerdehiyê bikin, ev tiştekî rast nîn e. Divê ev yek demildest bê rakirin."

KMM: NE TENÊ 'SONDA ME' DIVÊ HEMÛ MEWZÛATÊN YEKPARE BÊN RAKIRIN

Sekreterê Giştî yê KMM'ê Emrah Şeyhanlioglu jî diyar kir ku pêkutiya "sonda me", hilberîna ramana yekpare ye û wiha got: "Gelo kesek ku dest bi dibistanê dike bi tirkî nizanibe û piştî bi darê zorê hînî tirkî bikin, bêje 'Ne mutlu Turkum diyene (xwezî bi yên ku dibêjin ez tirk im)', çiqas li gorî mafên mirovan e? Di vê mijarê de helwesta me zelal e. Ne tenê sond, divê hemû mewzûatên hilberîna ramana yekpare bên rakirin."

ANF

**

Nûçeya eleqedar:

- Hevserokê BDP'ê Demirtaş "Andimiz"ê boykot dike