Diyarname

Di maçên Play-offê yên ji bo beşdariya Kûpaya Cîhanê de surprîzek çêbû: Tîma Neteweyî ya Îtalyayê nekarî golê biavêje Swêdê û di encamê de nekarî here Kûpaya Cîhanê ya 2018'an.

Di maça yekemîn ku 10'ê mehê li Swêdê li dar ketibû de 1-0 têk çûbû, di maça duyemîn ku duh êvarê li bajarê Mîlanoyê li dar ket de deng ji golan nehat, maç bi 0-0 bi dawî bû. Bi vê yekê piştî sala 1958'an û heta niha yekem car e Îtalya nikare beşdarî Kûpaya Cîhanê bibe. Îtalya di salên berî vê de jî di sala 1930'î de nikaribû beşdarî tûrnûvayê bibe lê wê çaxê Federasyona Îtalyayê biryar dabû beşdar nebe. Wê çaxê sedema beşdarnebûnê nehatibû eşkere kirin lê hatibû gotin ku ji ber navbera Federasyona Îtalyayê û ya Ûrûgayê nebaş e û ji ber tûrnûva li Ûrûgay e ew beşdar nebûne.

Di sala 1958'an, di maça dawî ya hevtêkbirinê de Îtalya li hemberî Îrlandaya Bakur têk çûbû û xatir xwestibû. Ev yek wekî trajediyeke neteweyî di nav spora Îtalyayê de cih girtibû.

Û niha, piştî 59 salan li Îtalyayê trajediyeke nû çêbû: Îtalya bi vê encamê nikare beşdarî Tûrnûvaya Kûpaya Cîhanê ya 2018'an ku dê li Rusyayê li dar bikeve bibe.

Buffonî hêstir barandin

Piştî têkçûna Îtalyayê kaptanê Îtalyayê qeleparêz Gianluigi Buffon hêstir barandin. Buffonê ku di 20 salan de maça xwe ya dawî lîst piştî maçê ji bo çapemenî bi hêstiran got: "Ji ber ku min a dawî ya di tîma neteweyî de em têk çûn ez gelek xemgîn im." Di tora civakî de peyamên piştgiriyê ji bo Buffon hatin weşandin.

Rojnameyan got 'Felaket'

Malpera sporê La Gazetta dello SPortê sernavê "Ev qiyamet e, em li Kûpaya Cîhanê nîn in" weşand. La Stampa jî sernavê "Felaket" weşand û malpera Mediasetê ev yek wekî "Dram" bi nav kir. Rojnameya Libero jî bal kişand ser stada li Mîlayê San Siro û sernavê "Li San Siroyê mirin".

Banga îstîfayê

Piştî maçê bang û rexneyên ji bo îstîfayê ji bo teknîk dîrektor Gian Piero Ventura û Serokê Federastona Fûtbolê ya Îtalyayê Carlo Tavecchio hatin kirin.