Diyarname
"Rojên Belgefîlman ên Stenbolê / Documenterist" dest pê kir. Heta 7'ê mehê şahiya belgefîlman li benda we ye.

Îsal "Documenterist" di navbera 2-7'ê vê mehê de li dar e. Ev çalakiya nîşandayîna belgefîlman yekem car par ji aliyê Kolektîfa Henerê ya Avrasyayê ve hate li dar xistin û îsal duyemîn car e li dar dikeve. Belgeîlm li salonên Goethe-Institut Stanbul, Navenda Çanda Fransiz, Balyozgeriya Hollanda-Union Church of İstanbul û Sînemaya Muzeya Perayê têne nîşandayîn.

Ji bilî nîşandayîna belgefîlman pêşangeha wêneyan, çalakiyên din jî têne li dar xistin. Ji Şiliî heta Rusya, Hindistan û Fasê, ji gelek welatan li dor 50 belgefîlmî û li dor 20 belgefîlmî jî ji Tirkiyeyê têne nîşandayîn.
"Documenterist" par bi eleqeyeke baş re rû bi rû ma. Ji ber vê yekê îsal piştî Stenbolê dê li hin bajarên din jî ev çalakî bê lidar xistin.

Documenterist îsal zêdetir li ser belgefîlmên Finlandiya û Bakurê Ewropayê disekine, mînakên serketî yên ji wir tîne pêşkêş dike. Di nav van de belgefîlmên ku bûne wekî klasîk ên bi navê "Sê odeyên melankolê", "Xetên narîn" û "Şoreş" jî hene.

Sazkarê belgefîlman ê navdar yê Fînlandiyayê, rêveberê beşa belgeîlman ê televîzyona dewletê Iikka Vehkalahti jî dê bê Stenbolê û 7'ê vê mehê li Sînemaya Muzeya Perayê dersa sînemayê bide.

Ji Tirkiyeyê "Hilbijêra SIYAD'ê" balê dikişîne. Di vê beşê de belgefîlmên li ser kurdan ên wekî "Şawaxî" (Kazim Oz), "Du ziman, baxulek" (Orhan Eskikoy û Ozgur Dogan ), "Girtîgeha bi 5 Nimre" (Çayan Demirel), "Merza Êzîdiyan" (Rodî Yuzbaşi), "Hewîtî" (Mizgîn Arslan) jî hene.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.