Zekî Ozmen / Koln

Li Almanyayê kampanyaya avakirina dibistanekî bi piştgiriya Şaredariya Bajêrê Koln û Amedê û SMS’yên welatiyan hat destpêkirin. Kesên bixwazin dikarin ji Almanyayê bi rêkirina SMS’yê piştgirÎ bidin kampanyayê. 

Saziya bi navê Komela Mafên Mirovan a Tirkiyeyê û Almanyayê (TUDAY) û Alîkariya Zarokan a Mezopotamya (KiMe) ku navenda wan li bajarê Kolna Almanyayê ye, bi hev re di ban navê “Kolner Helfen” ango “Kolnî arîkariyê dikin” kampanyaya avakirina dibistanekî li Kobanî dan destpêkirin.

Şaredarê Bajarê Kolnê Jurgen Roters û Hevşaredara Bajarê Mezin a Amedê Gultan Kişanak jî bi armanca piştgiriya kampanyaya "Kolner Helfen" roja duşemê li heman bajarê bi hev re civîneke çapemeniyê lidarxistin. Kişanak spasî rêveberên kampanyayê kir û diyar kir ku ew amadene hemû cureyên piştgiriyê bidin vê hewldana ku hatiye destpêkirin. Şaredarê Kolnê Roters jî da zanîn ku berî niha karmendên şaredariya wan 10 hezar Euro alîkarî dane însiyatîfê û dê demeke kurt de 10 hezar Euroyên din jî alîkarî bidin.  

Însiyatîfa "Kolner Helfen" berî niha jî 45 hezar Euro alîkarî rêkiribû ji bo penaberên Kobanî.

Ji hêla din ve hemû welatî dikarin ji Almanyayê bi SMS’yan tevlî kampanyaya avakirina dibistanê ya li Kobanî bibin. Kesên bixwazin dikarin ser hejmara 81190 SMS’ê bi peyva "kölnerhelfen" rêkin û dê yekser 5 Euro bi vî awayî ji fatoreya telefona wan were birîn.