Diyarname
Weşanxaneyê Do sê pirtûkên nû pêşkêşî xwendevanan kir. Ji van yek jê helbest û du jê jî roman in.

Rondikên Hêviyên Wenda

Fêrgîn Melîk Aykoç ku gotarên wî, bi nivîs û pirtûkên wî yên li ser ziman em disin vê carê bi navê romaneke bi navê "Rondikên Hêviyên Wenda" li pêşberî xwendevanan e.
Aykoç di pirtûka xwe de novelên xwe bi sernavên "Bê qelind", "Pişk û şû", "Min xwelî li serê", "Ev mêr e, yan lorîkê min e", "Dotmam û pismam" pêşkêş kirine.
Ew, di pirtûka 247 rûpelî, di novela bi navê "Dotmam û pismam" de wisa dibêje: "Ew zinarên li diharê Girê Bîra Fendo bi guriniya ruxwandinê hêla warê Qasiman ve şeqitîn. Ba û bagerê kon û mal li hev gerandin. Dengê hawar û şînê li warê Çapanikê hêwirî. Xweza û esman çiya û banî xwestibûn bi vê tofanê, tirseke erjengê nayende têkin dilê kesên wek Mendo serhişk in. Erd û esman hatin ziman û gotn:
'Em tiştekî wisa bikin, bila bibe şoreşekê û encamê wê ti caran neyê ji bîr kirin.'
Tirs ket dilê Mendo, poşmanî ew girt, çavên wî xwîn rijiya, lewçe çira mala xwe û pêşeroja xwe bi destê xwe dabû vemirandin. Xwe bi xwe got:
'Ev çi xwelî bû min li xwe kir! Ev çi gû bû min xwar! Mala xwe wêran kir! Divê gel bila min lînç bike. Da ku ti kesên din vê zulmê li zarokên xwe nekin.'"

Rêwiyê bê welat

"Rêwiyên bê welat" romana Ozgur Kiynak e ku ji Doyê derketiye. Roman wekî pirtûka yekemîn, duyemîn heta pirtûkan şeşemîn hatiye nivîsandin. "Pirtûk" bi van sernavan hatine nivîsandin "Box", "Peyçûn", "Evîn", "Rê", "Jan", "Armanc". Pirtûka ku ji 143 rûpelan pêk hatiye di heman demê de di tehma çîrokan de ye.
Ozgur Kiynak di van beşan de di beşa "Rê" de wisa nivîsiye:
"Derî ji carekê de vebû û tevê xeberdanê Brûsk şikiya nav odê.
'Sibê komekî dişînin û yên din jî hema li dû wan dê herin.'
'Bi keştiyê? An çawa dişînin?'
'Keştî betal bûye. Darayiyê dest daye ser. Deynê vî hebû ye. Lê yeke din kirê dikin. Niha dê me bi teyarê bişînin.'
Kanî tevî xewê, hewcedarî dît ku gotinên wan guhdar bike. Yên ku li odeyê radiziyan hemû ji nav nivînê xwe firiyan û wî guhdarî kirin."

Ji bo Kurdistan

Pirtûka din ku ji Doyê derketiye pirtûka helbestan e. Pirtûka nivîskar Herbijî bi navê "Ji bo Kurdisan" hatiye weşandin.
Nivîskar Herbijî xwedî jiyaneke cihêreng e. Navê wî bi xwe jî vê cihêrengiyê nîşan dide.
Di helbestên Herbijî de şopa Cegerxwîn xwe nîşan dide. Ew di helbestên xwe de bang li keç û xortan dike, bang li karker, cotkar, ronakbîr û sofiyan, bang li hemû gel dike. Di heman demê de aştî, azadî û neteweperwerî jî xwe nîşan dide di helbestên wî de.
Çarînek ji helbestên Herbijî:
"ji kerkûk û batmanê
benzîn diçe cîhanê
gazî dikin we xortan
warê me ye kurdistan
bes e bes neyarê hev bin!
neyarên me mîlyon in, werin hemû tev bin!"

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.