.jpg)
Rojnameger Murat Bayram xwedî û edîtorê Botantimesê ye. Wê rojê nivîsek bi sernavê “Kurdên ku piştevanîya Ak Partîyê dikin çima ne xwedîyê rojnameyeka kurdî ne?” nivîsiye.
Kurteya nivîsa Murat Bayram ev e: "Di encama ‘terorîzekirina’ medyaya kurdî ya li Tirkîyeyê, her çîqas bi milyonan kurd piştevanîya hikûmetê dikin jî, ew cir’et nakin û newêrin rojnameyekê bi zimanê kurdî biweşînin."
Bayram ev nivîs bi îngilîzî nivîsiye û paşê wergerandina kurdî. Pirs rast nebe, ji cihên rast neyê kirin dê bersiveke rast çawa jê derê?
Bi ser hin xalan re meseleyê em bidomînin. Pirsa pêşî: Bi mîlyonan kurdên piştevaniya hikumetê dikin heta îro ji bo "normalîzekirin"ê çi kirine ku dê ji bo normalîzekirina medyaya kurdî rojnemeyeke derxin?
Em pirsan bidomînin: Ev bi mîlyonan piştevanên AKP'ê ji bo kayûman kengê dengê xwe derxistin? Na. Ji wan yekî got, “Şaredarê Batmanê tu sûcekî wî tune bû, niha jî li mala xwe ye, me çima ji kar girtiye?” Na, negot.
Belkî hûn bêjin meseleya kayûman meseleyek giran e, siyaset jî li nav e, newêrin. Baş e, wê çaxê em hinek din meseleye siviktir bikin: Di sala 2016'an de gelek komeleyên kurdan hatin girtin ku ew ne siyasî bûn jî. Mînak li Amedê komeleyek bi navê "Sarmaşik" hebû. Tekane karê wê ev bû: Alîkarî dida feqîran. Bi biryarnameya KHK'ê (Biryarnameya di Hukmê Zagonê de) ew hat girtin. Li Amedê Komeleya Nivîskarên Kurd hebû. Nivîskar ha! Ne tiştek din. Ew jî bi heman awayî hat girtin. Li Stenbolê di sala 1992'yan de Enstîtuya Kurdî ya Stenbolê hatibû vekirin. Tenê karê wê xizmeta ziman bû. Ew jî rastî heman qederê hat. Alîgirên ku hêja Murat Bayram qal dike rojek rabûn ji bo van yekan dengê xwe derxistin? Na. Wê çawa be?
Em dest ji wan jî berdin, em dîsa ji mînaka Murat Bayram ku bi awayekî mafdar dibêje, "Kanalên TRTyê yên weşanên erebî û îngilîzî dikin bi yek zimanî ne. Bi tenê îngilîzî yan jî bi tenê erebî ne. Lê li TRT Kurdîyê navê hin programan bi tirkî ye û jêrenivîsa hin ji wan programan jî bi tirkî ye." Ev alîgirên ku Bayram qal dike ji bo dirustkirina vê kanalê tiştek nekirine, negotine, ka çawa wê werin ji bo te rojnameyek bi kurdî derxin û medyaya kurdî bikin medyayeke normal?
Li aliyê din gelek tiştên ku bi kurdî bûn jî kayûman ji holê rakirin; ji bo van yekan jî alîgirên AKP'ê tiştek negotin.
Loma jî pirsa Murat Bayram pirseke rast e lê cihê ku jê tê kirin şaş e. Çima şaş e? Ji ber ku cihê ku pirsê jê dike ne cihek normal e.
Pirsên normal ji kes û cihên normal têne kirin. Lê cih ne normal be pirskirina ji wir mirovan dibe ber bi cihek din ve: Gelo nivîskar dixwaze vî cihî wekî ciheke normal nîşan bide?
Nivîs bi îngilîzî hatiye belavkirin. Mînak îngilîzek vê nivîsê bixwîne, dê bêje qey alîgirên vê partiyê di rewşek normal de ne, tiştên normal kirine, lê tenê ji bo medyaya kurdî tiştên normalîze nekirine. Îngilîzek hay ji girtina Enstîtuya Kurdî ya Stenbolê tune be û nizanibe alîgirên AKP'ê dijî girtina vê saziyê deng nekirine dê bêje qey li Tirkiyeyê her tişt normal e. Lê hêja Murat Bayram qala girtina van saziyên normal, saziyên ji rêzê, ne siyasî jî bikira, paşê pirsa xwe bikira, mesele dê zelaltir bihata fêmkirin. Lê niha na. Niha ev pirsa hêja Murat Bayram me ber bi vê ve dibe, "Bi vê nivîsê ew aliyekî ku ne normal e, normal nîşan dide." Ev jî ne karê hêja Murat Bayram e, ne jî karekî rojnamegerî din e.
Hêja Bayram nivîs bi îngilîzî nivîsiye, dibe ku bi vê nîşanî sponsor-piştgirên saziya xwe dide ku ew rojnamegerî di nav rewşeke giran de dikin. Îhtîmal heye fikra wî ev bû. Îhtîmal heye, ji bo hinek din alîkariyeke baştir bigire rewşa giran a rojnamegeriya kurdî ya vir nîşan daye. Niyet çi dibe bila bibe, bi ya min ev nebûye. Ji niyet û fikir cudatir, dîmena ku nîşan daye ne dîmenek di cih de ye. Dikare bi mînakên din agahiyên vir bide piştgirên xwe, lê bi vê nebûye mixabin.
Wekî din di nivîsê de gelek propagandaya saziya xwe kiriye, ev jî jixwe meseleyeke din e. Di vir de ew serbest e. Sazî ê wî ye, cihê nivîs lê weşandiye ê wî ye, çiqas bixwaze ew qasî dikare propagandaya xwe bike. Lê paragrafek heye ku ez bibîr nexim dê aliyê min ê rojnamegerî, min aciz bike. Ew jî ev e: “Botan Times tekane cih e ku hemû siyasatmedarên kurd yên li Tirkîyeyê, ji YSPyê ta AK Partîyê, ji CHPyê, MHPyê, İYİPê, Gelecekê, Saadetê… û DEVAyê tên dîtin.”
Bêyî dirêj bikim bi çend gotinan; MHP û hinên din ne kurd in, siyasetmedarên di nav van de jî xwe kurd nabînin, loma jî, ger MHP jî bi qasî yên kurd di saziyeke kurdî de cih dibîne, jixwe ew der bi pirsgirêk e.
Axir, bila her serketî be.
Not: Min dest nedaye zimanê paragrafên ji nivîsa Murat Bayram hatine girtin.
Ji bo yên bixwazin lînka nivîsê ev e:
https://botantimes.com/kurden-ku-pistevaniya-akpye-dikin-cima-ne-xwediye-rojnameyeka-kurdi-ne/
.jpg)
.jpg)
.jpg)
