DiyarName.Com

Di edebiyatê de nêzikahiya li nirx û sembolan

Dîrok: 13/12/2019

Sembol û nirx, li gorî niyetan, mehne digirin têne bikaranîn. Li başûr "şerefa Kurdistanê" ji jiyana wan, êş û azarên wan û xeyalên wan bimehne dibe û wê wekî sondeke mezin jî bikartînin. Wexta bazirganekî bakurî di têkiliyên ticarî de wê sondê dixwe îhtîmal e ji ber gelek sebeban niyet û bawerî biguhere!

Çi xweserîxwaz û federalîxwaz bin, çi serxwebûnxwaz bin maf û heqê her kesî ye li gorî fikrên xwe nirxên xwe biafirîne. Kurd jî ji alî statuyê ve xwedî her tercih û mafî ne, siyaset û îradeyên kurd, rewş ê kurdan ber bi kîjan statuyê ve bibe aniha bi me ve baş xuya nake.

Heke niyet durist be, mirov bi rastî bawerî pê hebe, dikare li nirx û sembolên xwe xwedî derbikevin. Lê ku mexsed hebin li gorî wan mexsedan, hesasiyet werin bikaranîn ya herî muhîm di qada edebiyatê de ew were kirin qebhet û sextekariyeke mezin e.

Heke dildarî û hesteke wisa mijar be nexwe, di edebiyatê de deyndariya li hemberî Helebçeyê, deyndariya li hemberî trajediyên wekî trajediyên êzîdiyan tê û dimîne li benda şîroveyan!

Bi berheman, em xwe ji wî bar û deynî nekin ê heqê me tunebe em bi durişme, qalib, ajîteyê xwe bixapînin. Çi li bakur be, çi li başûr be, çi têkiliyên bi başûr re bin çi jî têkiliyên bi siyaset û saziyên bakur re bin, ger li ser esas, rastî, rê û rêçikên edebî nebin, ger ji bo nav û berjewejendiyên şexsî û sazgariyê bin qîmeta xwe nîn e, heyf e. Yên li ser wî guhî radikevin bi wijdanê xwe çi diwezînin hêjayê mereqê ye.

Dibe ku were gotin edebiyata milî, edebiyata îdeolojîk jî hene, belê, ew cure jî hene lê ew cure edebiyat jî bazara hest û ajîteyê red dikin.

Israra di edebiyatê de, israra ji bo edebiyata ku dinya elem bi gelemperî pê re mijûl e, israr ji bo edebiyateke bi wî awayî li benda ceribîn û israra me ye, ew awa edebiyat bo vî zimanî, pê re jî bo têkiliya vî welatî ya bi dinyayê re rêya herî vekirî, dûr û dirêj e.

Hin Nivîsen Nivîskar

Ji bo ZIRYAB em dikarin çi bikin?

30 Avrêl 2016

Heya niha ji ber şert û mercan nivîskar, muzîkjen, hunermendên kurd bi tevî karê xwe dest avêtine siyasetê jî da karibin zextan sist bikin, bi siyasetê re mafan bi dest...

LÊ EZ ŞOQ NEBÛM!

30 Pûşper 2016

Hin însan hene ku kevirên wan di bêrîka wan de ne û dimînin li benda keysa xwe, ji rojên bi mij hez dikin. Xuyaye min pê li zikê kesên din kiriye! Baş e, Hemdullah...

Bila ev nîşe ji bo aştiyê bin

21 Tebax 2009

Kêliyên lihevhatinê ger em wekî demsalekê bifikirindişibe halê atmosferê yê biharê; geh ewr be geh sayî. Wextê ewr be jî yê geh ewrê...

Cîhan ROJ kî ye?

Cîhan Roj, di sala 1965'an de, (di qeyda fermî de 1964) li gundê Înaqa Gimgimê ji dayik bûye. Dibistana seretayî li gund, ya navîn û lîse li Gimgimê xwendiye. Despêka bi kurmancînivîsana wî 1993 ye. Di heman salê de helbest û çîrokên wî têne weşandin. Di salên du hezarî de ew hinek termên matematîgê diafirîne û ji Enstituyê re bi rê dike. Ew xebat di sala 2006'an de di Azadiya Welat de tê weşandin. Nivîskar ji sala 1993'yan heya sala 1997 an li Mêrdînê, li sendîkaya kedkarên qada perwerdehiyê, wekî sekreterê perwerdehiyê rêveberî dike. Di sala 2001'ê de, bi pêşniyara wî, li Îzmîrê, ‘Konferansa Nivîskaran’ tê lidarxisitin. Li dû konferansê, ew qerar digire û bi tenê bi edebiyatê re mijûl dibe. Dîwana wî ya ewil “Ratîka” di sala 2002'yan de çap bûye. Di gelek malper, rojname û kovaran de, nivîsên wî hatine weşandin. Romana wî “Perde” bi navê “Mahrum” bi tirkî derketiye. Bi tevî pirtûkek di derheqê Cîgerxwîn de hatiye weşandin, di pirtûka bi navê “Kawayê Min” de û di pirtûka kurteçîrokan a ji hêla Şaredariya Amedê ve hatiye çapkirin de ew jî yek ji nivîskaran bû.

Heya niha gelek pirtûkên wî ên helbestê, çîrok û romanên wî hatine weşandin. Dosya helbestan a nû "Asê", romana wî a nû “7 AV 7 Agir 7 Derî” bi tevî hemî berhemên wî wê heya payîza 2023'yan ji nav weşanên Peywendê werin weşandin.

Cîhan Roj hê jî bi romanûsiyê re mijûl e.