Şirnex
Kesên ku di Pêşbaziya Helbestan a ji bo bîranîna siyasetmedarê kurd Orhan Dogan tê lidarxistin de bi ser ketine, plaketên xwe di merasîmê de girtin. Di merasîma xelatê ya ku di rojbûna Dogan de hate lidarxistin de, helbestvan Hîcrî Îzgoren û Fatma Savci jî helbestên xwe pêşkêş kirin.

Pêşbaziya Helbestan a Orhan Dogan, ji bo bîranîna siyasetmedarê kurd Orhan Dogan ku par di Festîvala Bazîdê de di encama krîza dil de jiyana xwe ji dest dabû, ji aliyê Rêxistina DTP'ê ya Cizîrê û Navenda Çand û Hunerê ya Mem û Zîn ve bi hevkarî tê lidarxistin. Kesên ku di pêşbirkê de bi ser ketin diyar bûn. Ji bo xelatdayînê li  Navenda Çanda Mem û Zînê merasimeke hate lidarxistin. Serokê DTP'a Şirnexê Halîl Îrmez, Şaredarê Şirnexê Ahmet Ertak, Şaredarê Sîlopiyê Muhsun Kunur, Şaredarê berê yê Cizîrê Aydin Budak, Cîgirê Şaredarê Cizîrê Ahmet Dalmiş, Serokê DTP'a Cizîrê Yakup Budak, helbestvan Hîcrî Îzgoren û Fatma Savci û komek qelebalix a turîstan jî di nav de nêzî 300 kes beşdarî merasîmê bûn.
Di şevê de wêneyên Orhan Dogan, Cîhan Denîz û Husnu Ablay hatin daleqandin.

'Dogan, hewl da ku dengê bêdengan ragihîne'

Piştî rêzgirtina ji bo şehîdên demokrasiyê, Serokê DTP'a Cizîrê Yakup Budak, axaftinek kir û diyar kir ku wê di demên pêş de Orhan Dogan ne tenê bi helbestan, bi gelek beşên wêjeyê binirxînin. Budak, wiha berdewam kir: "Feraseta ku dema Orhan Dogan dijiya tehamulê wî nekir piştî ku mir jî, ew wekî 'terorîst' îlan kir. Em vê ferasetê bi nefret şermezar dikin. Feraseta paş de mayî, ji çanda aştî û demokrasiyê ya ji aliyê Dogan ve hatiye afirandin, ditirse. Dogan, hewl da ku dengê bêdengan ragihîne."
Budak got ku pêkanîna kurkirina bi darê zorê ya porê ya li hemberî Rêberê PKK'ê Abdullah Ocalan çêbûye jî protesto dikin. Şaredarê Şirnexê Ahmet Ertak jî di axaftina xwe de got ku Orhan Dogan ê li Cizîrê rasterast bûye şahidê aliyê bi êş û elem ê şer, her tim hewl daye ku çanda aştî û demokrasiyê şîn bike.

Kurdî dîsa di rêza duyemîn de ma

Piştî axaftinan, merasîma xelatê dest pê kir. Ji nav welêt û ji derveyê welêt 19 kurdî, 63 tirkî, bi tevahî 82 helbest ji bo pêşbaziyê hatin şandin.
Di beşa helbestên kurdî de Lokman Budak bi helbesta "Roj Min da Pişta Xwe" bû yekemîn, Ergun Çelîk bi helbesta "Êşa min" bû duyemîn û Hasan Oflas jî bi helbesta "Giyanek Firiya Çû" bû sêyemîn.
Di beşa helbestên tirkî de jî Halîde Yildirim bi helbesta "Law Lawo" û Ozlem Keskîn jî bi helbesta "Ruya (Xewn)" bûn yekemîn. Mesut Varol bi helbesta "Bîr Halkin Sesî (Dengê Miletek)" bû duyemîn, ji Girtîgeha Êlihê Mehmet Kavak bi helbesta "Birca Belek’în Menekşesî (Binevşa Birca Belek)" bû sêyemîn. Kesên di pêşbirkê de bi ser ketin, plaketên xwe girtin.

Tunebûna afîşên bi kurdî hate rexnekirin

Piştî ku helbestên bi ser ketine hatin xwendin, juriyên pêşbirkê Hîcrî Îzgoren û Fatma Savci jî helbestên xwe yên bi kurdî û tirkî xwendin. Piştî xwendina helbestan, Savci axaftinek kurt kir. Savci diyar kir ku ji ber hindikbûna hejmara serlêdana helbestên bi kurdî xemgîn bûye û tunebûna afîşên bi kurdî ya di merasîmê de jî rexne kir.
3 keçikên ku beşdarî pêşbirkê bûn, helbestên xwe yên li ser Orhan Dogan nivîsandine, xwendin. Temaşevanan ji bo helbestan demeke dirêj li çepikan xist.

Ji DÎHA'yê hatiye girtin