Cemil Oguz

Rojên  Belgefîlman a Stenbolê DOCUMENTARIST îsal di navbera rojên 7-12'yê pûşperê de li dar dikeve. Bername hat eşkerekirin.

Ji bo eşkerekirina bernameya Documentarîsta îsal li Salt Beyogluyê kokteylek hat lidar xistin. Di kokteyla ku gelek belgefîlmsaz û derhêner lê amade bûn de amadekarên Documentaristê Emel Çelebi û Necati Sonmez li ser bernameyê agahî dan.

Di nav bernameya îsal de ji 30 welatan bi ser 70 belgefîlmî de belgefîlm dê bêne nîşandayîn. Her wiha xebatên atolyeyê, panel, pêşkêşî, gotûbêj jî dê di vê çarçoveyê de li dar bikevin.

Ji bo Sûriyeyê beşek taybet hatiye amadekirin û di vê çarçoveyê de hin belgefîlm dê bêne nîşandayîn. Documentarîstê di vî warî de bi Mala Çandê ya Sûriyeyê ya Stenbolê Hamisch re hevkarî kiriye û belgefîlmên Beşa Sûriyeyê amade kirine.

 Her wiha belgefîlmên li ser madenê jî ji bo bibîranîna Soma û madenên din dê bêne pêşkêş kirin.

Beşa Polonya

Îsal 600'emîn sala Têkiliyên Dîplomatîk ên Tirkiye-Polonyayê têne pîrozkirin. Ji bo vê yekê di nav bernameyê de jî belgefîlmên baş ên ji Polonyayê hatine destnîşankirin. Festîvala Fîlman a Krakow ya Polonyayê yek ji festîvalên girîng e. Di 40 salên dawî yên vê festîvalê de belgefîlmên ku bi ser ketine ji nav wan neqandineke hatiye kirin û 12 belgefîlm ji bo Documentarîstê hatine hilbijartin. Di nav vê hilbijêrê de  berhemên derhênerên wekî Krzysztof Kieslowski, Kazimierz Karabasz, Marcel Lozinski, Wojciech Wiszniewski cih digirin. Her wiha derhêner Pawel Lozinski jî di festîvalê de wê wekî mêvan cih bigire, wê qala belgefîlmê xwe "Bav û kur" (Father and Son, 2013) bike. Lozinski li ser bavê xwe ev belgefîlm dikişand lê di dawiyê de wan li hev nekir, ji hev xeyidîn û di dawiyê de du versiyonên belgefîlm derketin holê. Derhêner Lozinski wê qala vî belgefîlmî û pêvajoya kişandinê bike.

Belgefîlmên ji Tirkiyeyê 

Ji Tirkiyeyê bi ser 20'î re belgefîlm hene. Di beşa Panoramaya Tirkiyeyê de derhênerên kurd ên wekî Kazim Oz, Fatih Pinar, Veysi Altal, Zeynel Koç, Devrim Akkaya bi belgefîlmên xwe cih digirin. Belgefîlmê Kazim Oz "Hebû Tune bû" ku di Festîvala Fîlman a Stenbolê de îsal Xelata Juriyê ya Taybet û xelata Fibresci girtibû di Documentaristê de hem di beşa Panoramaya Tirkiyeyê hem jî di beşa Hilbijêra Fibresci de cih digire. Beşa Hilbijêra Fibresci îsal yekemîn car li dar dikeve.

Belgefîlm îsal li salonên Navenda Çanda Fransiz, Konsolosxaneya Hollanda, Salt Beyoglu, Aynali Geçit û Navenda Çanda Romen bêne nîşandayîn.