Diyarname

5'emîn Fûara Pirtûkan a Amedê bi merasimekê vebû. Hevseroka Şaredariya Bajarê Mezin a Amedê Gultan Kişanak got ku ji bo weşangeriya kurdî bigihîje asta ku heq dike bar dikeve ser milê me hemûyan.

Fûara Pirtûkan a Amedê ku heta 25'ê mehê dê li dar be, bi merasimekê deriyên xwe vekirin. Di fûarê de li dor 150 weşanxane û saziyên sivîl stand vekirine û di çarçoveya fûarê de li dor 60 çalakiyên çandî dê li dar bikeve. Her wiha li bendê ne ku li dor 300 nivîskarî pirtûkên xwe îmze bikin.

Di merasima vekirina fuarê de Midûrê Giştî yê TUYAP'ê Îlhen Ersozlu got ku sedî 20 fûar mezin bûye û îsal li bendê de ku bi ser 100 hezarî de kes bên serdana fûarê.

Kordînatorê TUYAP'ê Deniz Kavukçuoglu jî kesên li Somayê mirin bibîr anî û got: "5 sal in li Amedê me pêvajoya aştiyê ku hêviyan şax dide şopand. Hêviya me mezin e, em hêvî dikin ku ev pêvajo li gor daxwazê bi encam bibe. Lê felaketên ku ev hêviya me êşandin jî çêbûn. Li Roboskî, Reyhanli, herî dawî li Somayê me canên xwe winda kirin. Em hêvî dikin ev felaket careke din derneyên."

Kavukçuoglu got ku li Amedê ew enerjiyeke pozîtîf digirin û wisa dom kir: "Her ku em eleqeya gelê herêmê dibînin em dibêjin ku baş bû me fûar vekiriye. Ev qadeke demokratik de pir zimanî, pir çandî, pir etnîkî, gelek bawerî û fikrên siyasî têde tên ba hev. Li Tirkiyeyê mînakek wisa nîn e. Li Tirkiyeyê pêdivî bi rayedarên ku hurmetê mafên mirovan bidin û bi vî awayî bi rê ve dibin heye." 

Serokê Komeleya Nivîskarên Kurd Mehmet Yilmaz jî got ku Ebdula Peşêw xelata Nobelê heq dike û wisa got: "Zimanê kurdî ji zû de ye xelatek wisa heq dike. Em ne li dû xelatan in. Lê xelatkirineke wisa dê wekî lêborîna Ewropayê ya ji bo zimanê kurdî bê qebûlkirin."

Hevseroka Şaredariya Bajarê Mezin a Amedê Gultan Kişanak jî axivî û got ku ew di şexsê Ehmedê Xanî de hurmetên xwe ji bo her kesê ku ji bo kurdî xebetiye ku li hemberî hemû zordarî ziman heta anîne û wisa got: "Weşangeriya kurdî, wêjeya kurdî, ji bo ku were cihê ku heq dike bar dikeve ser milê me hemûyan. Fûar jî di vî warî de rola xwe dilîzin."

Kişanak bal kişand ser panela "Jin divê çima binivîsin?" û xwest ku bi taybetî piştgiriya wêjevanên jin bê kirin û ji bo nivîskarên jin serketin xwest.

Hevşaredar Kişanak got ku her kesê li fûarê bigere miheqeq divê herî hindik du pirtûkan bikire û yek ji van jî pirtûka bi zimanê zikmakî be.

Piştî merasima vekirinê Hevserokên Şaredariya Bajarê Mezin a Amedê Gultan Kişanak û Firat Anli li fûarê geriyan, silav li weşangeran kirin.

***

Nûçeyên eleqedar;

- Komeleya Nivîskarên Kurd ji bo Fûara Pirtûkan bernameya xwe amade kir 

- Weşanxaneyên beşdarî Fûara Amedê dibin û çalakiyên wan

- Fûara Pirtûkan a Amedê 5 salî ye 

*** 

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.