Enqere
Konferansa 'Pirsgirêka kurd: Lêgerîna aştî û pêşerojê ya bi hevre' ya ji hêla Platforma Abantê ve hatî pêkanîn, bi eşkere kirina encamnameyê bi dawî bû. Di encamnameyê de pirsgirêk kurd wekî pirsgirêka herî girîng û sereke ya Tirkiyeyê hate ravekirin.
Konferansa 'Pirsgirêka kurd: Lêgerîna aştî û pêşerojê ya bi hev re' ya ji hêla Platforma Abantê ya bi nêzîkahiya xwe ya cemaeta Gulen tê zanîn ve hate pêkanîn, bi dawî bû. Di encama konferansê de encamnameyek hate weşandin. Encamnameya konferansa ji bo çareseriya pirsgirêkê referansa ol hate pêşniyarkirin û pirsgirêka kurd bi piranî wekî pirsgirêkek aborî hate nirxandin. Encamname ji aliyê Prof. Dr. Mete Tunçay, nivîskar Altan Tan, Prof. Dr. Mumtazer Turkone ve hate eşkere kirin. Di encamnameyê de pirsgirêka kurd wekî pirsgirêka herî girîng û sereke ya Tirkiyeyê hate daxuyandin. Di encamnameya ku ji aliyê nivîskar Altan Tan ve hate xwendin de wiha hate gotin:
"Çareseriya pirsgirêkê girêdayî avakirina hawira diyalogê, şikandina pêşdarazan û avakirina baweriya dualî ye. Armanca platformê ew e ku ji bo çareseriyê hawirek baş bê avakirin. Li şûna peydakirina mutabaqatekê, armanca platforma avakirina zemîna nîqaşkirina pirsgirêkê ye. Prensîba platformê ew e ku heta bangawaziya eşkere ya şidetê tune be, hemû fikir bi awayek serbest bên nîqaşkirin. Hemû hewldanên şidetê dihundirînin lazime bên redkirin. Em vê yekê ji bo çareseriya pirsgirêkê wekî xala sereke dibînin. Em polîtîkayên asîmîlekirina kurdan red dikin. Di pirsgirêka kurd de gelek êş hatin kişandin. Lazim e ev êş wekî tecrubeyekê bên nirxandin û pirsgirêk wekî xwîndariyê neyê dirêjkirin."
Di encamnameyê de hate xwestin ku li herêma ku kurd lê zêde dijîn ên wekî herêmê aborî bê pêşxistin û ev tişt hatin xwestin: "Divê şeref û heysiyeta gelê herêmê wekî heq dikin bê bilind kirin. Pêwîst e hemû mafên çandî, siyasî û civakî bêyî kêmasî bên qebûlkirin. Bikaranîna zimanê zikmakî ya di warê perwerdehî û hîndekariyê de mafek herî bingehîn ê mirovan e û astengkirina vî mafî bi tu awayî nayê îzahkirin. Ji ber ku rêzgirtina li hemberî ziman, rêzgirtina li hemberî mirov e. Em hemû pêkanînên di pirsgirêka kurd de derdikevin derveyî zagonan red dikin. Ev hewldana me hêza xwe ji hev re jiyana bi sedan salan e digire û hêvî dike bibe wesîleya hewirek demokratîk û pêvajoya çareseriyek demokratîk."
Her wiha hate zanîn ku li ser daxwaza beşdaran piştre ev xal li encamnameyê hatin zêde kirin: "Lazim e bingeha zagonek efûyê bê amadekirin. Ligel hemû gelên li Iraqê dijîn kurd jî birayên me ne. Em pêşvebirina têkiliyên bi rêveberiya Federal a Kurd re elzem dibînin. Ji bo çareseriya pirsgirêka kurd, pêşvebirina demokrasiyê elzem e. Ji bo vê yekê parastina perspektîfa Yekîtiya Ewropayê girîng e."
Ji DÎHA'yê hatiye girtin