Cemil Oguz

32'yemîn Fûara Pirtûkan a Stenbolê bi merasima vekirinê deriyên xwe vekir. Di vekirinê de Kordînatorê Giştî yê Fûarê Deniz Kavukçuoğlu got:  "Em dikarin ji bo vir bibêjin platforma her cure fikir, bawerî; kursiya qirase ye ji bo van. Ji kîjan bîrdozî, bawerî dibe bila bibe berhemên xwe pêşkêş dikin. Ji ber ku çalakiyeke wisa me diyarî Tirkiyeyê kiriye ez serbilind im:"

32'yemîn Fûara Pirtûkan a Stenbolê bi beşdariya 690 weşanxane, saziyên sivîl îro dest pê kir. Ji bo vekirinê merasimeke hat lidar xistin. Di merasimê de pêşî Kordînatorê Giştî yê Fûarê Deniz Kavukçuoğlu axivî. Kavukçuoglu ji bo beşdariya her kesî sipasiyên xwe pêşkêş kir û got: "Em dikarin ji bo vir bibêjin platforma her cure fikir, bawerî; kursiya qirase ye ji bo van. Ji kîjan bîrdozî, bawerî dibe bila bibe berhemên xwe pêşkêş dikin. Ji ber ku çalakiyeke wisa me diyarî Tirkiyeyê kiriye ez serbilind im:"

Dûre Serokê Weşangerên Tirkiyeyeyê (TYB) Metin Celal Zeynioglu jî li ser pirtûkên ku li Tirkiyeyê têne weşandin îstatîstîk dan, got ku li Tirkiyeyê serê 6 kesî pirtûkek dikeve. Zeynioglu got ku li gor UNESCO'yê Tirkiye bi weşandina 42 hezar cure pirtûkan li dinyayê di nav 12 welatên pêşîn de ye.

Sipas ji bo weşanxaneyên pir reng

Zeynioglu qala çalakiyên aştiyane kir û got ku ji ber ku ji bo pir rengî, pir cureyî ne her çalakiyên aştiyane ew piştgiriya wan dikin û bal kişand ser gotina Serokomarê Tirkiyeyê Abdullah Gul ku gotibû "Li Parka Geziyê ciwanên ku ji bo  hestiyariya hawirê û estetîka bajêr çalakiyên aştiyane kirine, ez vê çalakiya wan wekî gaveke demokratîk dibînim". Metin Celal Zeynioglu got em jî beşdarî van gotinên Serokomar dibin û wisa got: "Her cure çalakiyên ku aştiyane bin em piştgirî didin û emê wan biparêzin. Ji ber ku ev yek bingeha weşangeriyê ye."

Zeynioglu ji bo sipasiya weşangerên beşdarî fûarê bûne jî wisa got: "Weşangerên ku pirtûkên xwe yên ji hemû rengan, nasname û meylan pêşkêş dikin, ez sipasiya wan dikim."

Vaye ev helbestvan jî heye

Serokê Lijneya Şêwirmendiyê ya TUYAP'ê Dogan Hizlan jî axivî. Hizlan qala e-pirtûkê kir û got ku ligel rewş diguhere, e-pirtûk derketine jî hê serdestiya pirtûkên çapkirî didome û lêkolînan nîşan dane ku pirtûkên çapkirî ji e-pirtûk ji aliyê maliyetê ve erzantir in.

Hizlan ji bo mêvanên dê bên fûarê jî ev pêşniyar kir: "Her kes li gor fikra xwe, bîrdoziya xwe pirtûkan dixwîne. Lê dema bê fûarê dê bîbine waye ev jî hene. Ji bilî helbestvanê em jê hez dikin, dê bibîne helbestvanên din jî hene. Fûar ev pircureyî, dewlemendî bi xwe re tîne."

Fûar piştî axaftinan bi merasima birîna qurdeleyê vebû. Di fûarê de li dor deh weşanxaneyên kurdan jî hene. Di fûarê de bi sedan nivîskar dê derkevin pêşberî xwendevanên xwe û pirtûkên xwe îmze bikin. Di van van de nivîskarên kurd jî hene.

îsal Welatê  Mêvan ê Fûarê Çîn e. Ji Çînê jî rayedar di vekirina fûarê de amade bûn. Her wiha li ser çanda Çînê dê gelek çalakî li dar bikevin.

Foto: Cemil Oguz 

***

Nûçeyên eleqedar:

- Weşanxaneyên Kurdan ên ku beşdarî Fûara Pirtûkan dibin
- Di TUYAP'a Stenbolê a îsal de çalakiyên kurdan

- Fûara Pirtûkan a Stenbolê hêdî hêdî tê