Diyarname

Kovara çandî û wêjeyê Dîwar hejmara xwe ya 7 û 8'an bi hev re derxist. Kovarê vê carê rewşa rêxistinên nivîskaran ên kurdan wekî Mijara Sereke girtiye dest.

Dîwar bi hejmara xwe ya 7 û 8'an a meha tîrmeh û gelawêjê derket. Kovara ku li kurmancî li Almanyayê derdikeve, hem li Ewropa hem jî li welat digihe ber destê aboneyan her mehê mijareke wekî Mijara Sereke digire dest. Di vê hejmarê de mijara sereke rêxistinên nivîskaran e. Nivîskarên kurd dîtin, têbînî û nirxandinên xwe yên di derbarê serboreyên avakirin û kar û barên rêxistinên nivîskarên kurd de nivîs nivîsîne. Li ser rêxistinên nivîskaran ên kurd yên li bakur, başûr, rojava, rojhilat û Ewropayê nivîs hatine weşandin. Ciwan Nebî, Xoşman Qado, Mihemed Şêxo, Qado Şêrîn, Hesen Silêvanî, Edîb Polat, Cemîl Oguz, Azad Zal, H.Îrandost, Zinarê Xamo û Lewend Hisên nivîs nivîsîne. Her wiha bi mijarê ve eleqedar bi Sekreterê PEN'a Kurd Kakşar Oremar re jî hevpevyîneke hatiye kiriye. 

Di beşê wergerê de Abdulkadir Mûsa helbestên Stefanie Obieglo ji almanî wergerandine kurdî; Cewad Pale jî helbestên Perwîn Îtîsamî ji farisî wergerandiye kurdî. Di vê cothejmarê de Omer Dilsoz li ser romana gundewar, Ciwan Qado li ser Josê Saramago û Lokman Polat li ser romana 'Çiyayî' ya Îlhamî Sîdar nivîsandiye. 

Her wisa çîrokên Yakup Aykaç, Kîbar Krîstîn Ozbey, Luqman Silêman, Cîhan Roj, Mahmut Ozçelik jî bi nivîsên xwe di kovarê de cih girtine.

Ji bo portereya vê hejmarê çîroknivîsê kurd Dilawer Zeraq hatiye hilbijartin. 

Ji bo agahiyên berfirehtir û hemû pirsan:

www.kovaradiwar.com