Li Rojava, li gelek cihan di navbera YPG û Cephed Nusra de şer didome. Bi gulebarana çeteyan kesek mir. Vane agahiyên rojekê:
El Nûsra taxê Kurdan yekser gulebaran dike
Nûçegiyanê ANHA yê Til Ebiyad ragiyand ku şerê di navbera Cephet El Ekrad û El Nusra de li derdora dadgeha bajar didome û çeteyên giridayî Nusra êrîşên xwe yên li ser taxê kurdan dijwar kirine, yekser taxên Lêl û Cisir gulebaran dikin.
Her wiha hat gotin ku i Til Ebiyad ji mizgefta bajar banga talan kirin û kuştina kurdan tê kirin û niha taxên kurdan talan dest pê kiriye. Hate ragiyandin ku Cephet Nusra bi tankan taxa kurdan topbaran dike.
Li gor agahiyên ji Til Ebiyad tên girtin, çeteyên El Nusra nasnameyan kontrol dike û kî Kurd be direvîne.
YPG: Emê gelê xwe yê li Til Ebyed biparêzin
Yekîneyên Parastina Gel (YPG) diyar kir ku çekdarên Cebhet El-Nusra êrîşî taxên kurdan ên Til Ebyed dikin û got ku YPG'ê dê erkê xwe yê parastinê pêk bîne û mudaxele bike. Rêveberiya Meclisa Leşkerî ya YPG'ê bang li gelê kurd kir ku piştgiriya hêzên wan bikin da ku gelê kurd li seranserî Rojava û Sûriyê biparêzin.
Di berdewama daxuyaniyê de hate bibîrxistin ku Cebhet El-Nusra di çarçoveya êrîşên xwe de bê cûdahî sivîlan direvîne û nijadperestiyê ji Rêjîma Baas zêdetir pêk tîne. Di daxuyaniyê de hate destnîşankirin ku komên çekdar ên Cebhet El-Nusra kurdên Til Ebyed ji malên wan derdixîne û hewldidin bajêr ji gelê wê yê sereke vala bikin.
Di daxuyaniyê de hate gotin ku Cebhet El-Nusra cebheyek din di êrîşên xwe vekir û hewldide ku gundên kurdan ên herêmê dagirbike û ji vir êrîşî bajarê Kobanê bike, di çarçoveya êrîşên xwe de komên Cebhet El-Nusra ji aliyê gundê Hebsê û gundê Gor Hese êrîş dike û hêzên YPG᾿ê neçarî bersivdayînê kirine. Di daxuyaniyê hate destnîşankirin ku di encamê de pevçûnên berfireh derketine û pevçûn hîn dom dikin.
Rêveberiya Meclîsa Leşkerî ya YPG᾿ê di daxuyaniya xwe de da zanîn ku hêzên wan li dijî êrîşan bê deng namînin û wiha dirêjî da daxuyaniya xwe: "Em wekî rêveberiya YPG'ê ji gelê xwe re diyar dikin ku em ê beramberî êrîşên hovane ên li dijî gelê me bê deng nemînin û emê erkê xwe yê parastinê pêk bînin. Em ê bi awayekî yekser li dijî van êrîşan derkevin û gelê xwe bi hemû pêkhateyên wê li seranserî Rojava û Sûriyê biparêzin."
El Nusra amadekariya komkujiyê dike
Hate ragiyandin ku Dewlet Îslam Iraq û Bîladî El Şam/Cephet El Nusra êrîşê xwe li dijî taxê Kurdan didomîne, bi tank, topê hawanê, çekê giran raste raste top baran dike. Tê diyar kirin heta niha El Nusra piraniya wan zarok û jin bi sedan kes revandine û bi ser jêkirinê tehdît dike.
Di encama topbarana El-Nusra de welatiyek mir, yek birîndar bû
Îro saet di 11.30᾿an de komên çekdar ên Dewleta Îslamî ya Îraq û Bîlad El-Şam ên girêdayî El-Qaîda, ji gundê Til Xelaf û Esfer Necar ên 2 kîlometre rojavayê bajêr guleyek hawanê avêtin taxa Zorava ya başûrê bajarê Serêkaniyê û di encamê de welatiyê bi navê Ebdulqehar Hisên ê 80 salî jiyana xwe jidest da û Cemal Kenas ê 50 salî jî birîndar bû.
Li aliyê din jî komên çekdar ên El-Qaîda ji dema ku ji Serêkaniyê hatine derxistin bi hawanan êrîşî bajarê Serêkaniya Serxetê û Binxetê dikin. Her wiha pevçûnên di navbera Hêzên YPG᾿ê û çekdarên Dewleta Îslamî ya Îraq û Bîlad El-Şam a El-Qaîda li derdora Til Xelaf û Esfer Necar bi awayekî demkî didomin.
Li Çilaxa Pevçûn didomin
Pevçûnên di navber hêzên YPG'ê û çekdarên Îslamî yên Cebhet El-Nusra û Dewleta Îsalmî ya Iraq û Bîlad El-Şam li herêma Çelaxa didomin.
Li gundên Girhok û Elî Axa yên girêdayî navçeya Çilaxa, pevçûnên ku beriya 5 rojan di navbera hêzên YPG'ê û çekdarên Îslamî yên Cebhet El-Nusra û Dewleta Îsalmî ya Iraq û Bîlad El-Şam bi awayekî demî hîn didomin. Hate ragiyandin di pevçûnên duh saetên şevê ku heta serê vê sivê dom kir tu kuştî û birîndar çênebûn.
El Ekrad: Em ê Emîrê El Nusra berdin
Fermandariya Cebhet El- Ekrad di malpera xwe ya fermî de diyar kir ku, di şerê şeva din de Emîr Dewleta Îslam Iraq û Bîladî Şam dîl girtine û ji bo sivîlên di destê Cephet El- Nusra ku di nava Dewleta Îslam Iraq û Bîladî Şam cih digre bêne berdan, Emîrê yê El- Qaîde bi navê Ebû Mûsaab yê Çeçen wê berdin.
Di daxuyaniyê de hete diyar kirin ku bûyerên li Til Ebyad û dorpêçkirina tabûra wan a Şêrgo El-Eyûbî û revandina mirovan li bin êrîşên li Til Ebiyad ji ber wan qebûl nekirine bikevin bin banê El-Qaîde pêk hatiye û niha zîviriye şerek li dijî gelê kurd û metirsiya komkujiyê. Di daxuyaniyê de hate gotin ku pevçûnên li herêmê dikevin çarçoveya xizmeta rêjîmê de û helwesta tabûrên din li kêleka Dewleta Îslamî ya Iraq û Bîlad El-Şam şermezar kir.
Di daxuyaniyê de hate bibîrxistin ku îradeya gelê kurd xurt e û temsîlkariyê qebûl nakin. “Em bi awayekî eşkere careke din dibêjin Cephet El- Ekrad nakeve bin banê Dewleta Îslamî ya Iraq û Bîlad El-Şam û nabin beşek ji El-Qaîde. Heta niha revandina bi sedan sivîlan diyar dike ku dixwazin herêmê ber bi nîjadperestiyê bibin û bê cudahî li dijî hemû kurdan derkevin."
Di berdewama daxuyaniyê de ev tişt hate gotin “Em bi bîra wan tabûrên niha li cem El- Qaîde cihê digrin tînin ku em û hemû sivîlên Til Ebyad me pêşwaziya wan kir ji ber ku me şoreş di wan de dît, lê me bawer ne dikir ku em vê zilmê ji wan bibînin.”
Di dawiya daxuyaniyê de hate gotin “Em soz didin ku heta dawî îradeya me têk naçe, em ê bi hemû hêza xwe ji bo ku em bimînin xwedî îradeyeke azad têbikoşin.”
Di dawiya daxuyaniyê de hate destnîşan kirin ku niha dê Emîrê El-Qaîda yê Çeçen Ebû Mûsaab beranberî berdana sivîlan bê berdan.
Asayîşa Hesekê bombeyek îmha kir
Navenda Ragihandiyê ya Asayîşê Hesekê diyar kir ku hêzên Asayîşê bombeya ji aliyê kesên nenas ve di parka 24'an de hatibû bicih kirin îmha kir. Hate gotin ku welatiyekî bi riya telefonê ji Asayîşê re ragihandiye ku bombeyek di torbeyeke çopê de hatiye bicih kirin dîtiye. Li ser vê yekê hêzên Asayîşê berê xwe dan parkê, ewlehiya heremê girtin û bi ziyanek bigêhêje kesê bombe îmha kir.
Li ber Asayîşê bombeyeke deng teqiya
Li avahiya navenda Asayîşê ya li Tirbespiyê îro di saetên serê sibê de kesên nenas bombeyek deng teqandin û di encamê de ziyana madî li derorê çêbû. Berî çend rojan li taxa Xerbî ya Tirbespiyê jî bombeyek deng teqiya û di encamê de ziyana madî çêbû.
Ciwanekî kurd di leşkeriya Sûriyê de hate kuştin
Ciwanê kurd Berxwedan Mihemed Xelîl ku leşkeriya bi darê zorê ya rêjîma Baas dikir, di pevçûnên 13'ê tîrmehê de hate kuştin.
Malbata ciwanê kurd Berxwedan Mihemed Xelîl diyar kir ku kurê wan leşkeriya bi darê zorê ya rêjîma Baas dikir û di pevçûnên li herêma Kiswê ya li paytexta Sûriyê Şamê ku di 13᾿ê tîrmehê di navbera hêzên rêjîmê û çekdarên muxalefetê de derketibûn hatiye kuştin. Malbata Xelîl destnîşan kir ku kurê wan ji beriya sal û nîvekê ve leşkeriya rêjîmê qedandibû û lê rêjîmê nedihişt ku ew were mala xwe. Cenazeyê Xelîl ji aliyê sedan kesî ve li goristana navçeya Şiyê hate definkirin.
Berxwedan Mihemed Xelîl di sala 1991'ê de li navçeya Şiyê ya Efrînê jidayik bûye.
Ev agahî ji Ajansa Nûçeya a Hawarê (ANHA) hatine girtin