AMED
Ji bo "Perwerdeya Zimanê Dayikê" û Cejna Zimanê Kurdî li Amed û hin cihên din roja 15'ê mehê meş tê lidarxistin.

Rêxistina BDP'ê ya Amedê, ji bo 15'ê Gulanê Cejna Zimanê Kurdî, li avahiya partiyê dauyaniyek da çapemeniyê. Daxuyanî bi zimanên kurdî û tirkî hat dayîn. Cîgirê Hevserokên BDP'ê yê Amedê Eşref Mamedoglû axivî diyar kir ku civakê ku zimanê xwe ji bîr kiribe, nikare bi tu awayî hebûna xwe biparêze û got; "Ji bo kurdî bibe zimanê fermî, bibe zimanê perwerdeya ji dibistana seretayî heta zanîngehê û vî zimanî bide nifşên pêşiya me, em têdikoşin û ev yek armancên bingehîn ên têkoşîna me ye."

Di daxuyaniyê de hat bibîrxistin ku, bi wesîleya 15'ê Gulanê Cejna Zimanê Kurdî, wê sibê ji ber avahiya Kongreya Civak Demokratîk heta Parka Koşûyolûyê meşek bê lidarxistin û banga tevlêbûnê li tevahiya welatiyan hat kirin.

JI KCD'Ê BANGA TEVLÊBÛNA MEŞÊ

Komîsyona Ziman û Perwerdeyê ya Kongreya Civaka Demokratîk (KCD) jî bi wesîleya Cejna Zimanê Kurdî li avahiya xwe civîneke çapemeniye lidar xist û Cejna Zimanê Kurdî pîroz kir. Endamê Meclisa Daîmî ya KCD'ê Osman Ozçelîk bal kişand ser zextên li ser zimanê kurdî. Ozçelîk bang li herckesî kir ku sibê saet 18'an de beşdarî meşa KCD, Egîtîm Sen û Kurdî Derê ya ji bo Cejna Zimanê Kurdî bibe.

JI OCALAN RE QERT HATIN ŞANDIN

Di vê navberê de, ji bo heman cejnê bi pêşengiya Navenda Giştî ya KURDÎ-DER'ê, di serî de ji Rêberê PKK'ê Abdullah Ocalan, ji hemû girtiyên siyasî re li Postaxaneya Navendî ya Sûrîçî, qert hatin şandin. Berî şandina qertan, Serokê Giştî yê KURDÎ-DER'ê Sebahattîn Gultekîn bi kurtî bibÎr xist ku yek ji daxwazên bingehîn ên bi hezaran girtiyên tevlî greva birçîbûnê bûn rakirina zextên li ser zimanê kurdî bû, lewma ew ji girtiyan re qertan dişînin. Gultekîn her wiha ji bo meşa sibê jî bang kir.

ERDÎŞ

Endamên KURDÎ-DER'a Erdîşê jî, ji bo meşa sibê ya ji bo Cejna Zimanê Kurdî li navenda bajêr belavok belav kirin. Serokê KURDÎ-DER'a Erdîşê Cevdet Zîlanli diyar kir ku, ewê sibê saet di 10'an de li ber avahiya komeleyê li hev kom bibin, dest bi meşê bikin û li Parka Zîlan daxuyaniyekê bidin çapemeniyê. Zîlanli diyar kir ku gelê kurd bi salan e bi tenê ji ber zimanê wan kurdî ye, li îşkenceyên giran rast hatiye û bang li gelê Erdîşê kir ku tevlî çalakiya sibê bibe.

SEMSÛR

Şaxê KURDÎ-DER'a Semsûrê jî li avahiya komeleyê civînek çapemeniyê lidar xist. Serokê KURDÎ-DER'a Semsûrê Şerîf Yilmaz Cejna Zimanê Kurdî li tevahiya gelê kurd pîroz kir û diyar kir ku, ewê bi vê armancê sibê saet di 17.30'an de li Parka Mîmar Sînan li hev kom bibin, ber bi Parka Demokrasiyê ve bimeşin û daxuyaniyekê bidin çapemeniyê. Di daxuyaniyê de hat ragihandin ku, roja 16'ê Gulanê jî wê li Salona Can saet di 20.00'an de bi beşdariya Koma Evîndar, Haşim û Gulistan Tokdemîr û dengbêj Uzêrê Şirfnî şahiyek bê lidarxistin. Di daxuyaniyê de bang li tevahiya gelê Semsûrê hat kirin ku beşdarî çalakiyên sibê û du sibê bibin.

Li Efrînê meh û şahî

Li Navçeya Şiyê ya Efrînê Saziya Zimanê Kurdî (SZK) bi armanca pîrozkirina Cejna Zimanê Kurdî meşek û piştre şahiyek bi beşdariya sedan ji şêniyên navçeyê û gundên wê lidar xist. Meş ji ber Navenda SZK’ê ya navçeyê bi beşdariya dehan mamosteyên zimanê kurdî, endamên Konfederasyona Xwendekaran û Tevgera Ciwanên Şoreşger dest pê kir.  Meşvanên ku bê navber sloganên “BIJÎ SEROK APO” û “Bijî Zimanê Kurdî” berz kirin, di nav taxên bajêr re geriyan, meş li ber meydana Dibistana Seretayî ya navçeyê bi dawî bû û li vir şahî dest pê kir.