Amed
Peyama Rêberê PKK'ê Abdullah Ocalan a ku di Newroza Amedê de hate xwendin di çapemeniya cîhanê de wekî nûçeya flaş cih girt.

Çapemeniya cîhanê wisa cih da peyamê.

BBC: Ajansa nûçeyan a navdar a îngilîz BBC banga Ocalan bi sernavê “Rêberê PKK’ê Ocalan banga agirbestê kir” ragihand.  Her wiha cih da xalên sereke yên banga Ocalan.

NOS: Weşana fermî ya Hollandayê NOS’ê jî peyama Ocalan bi sernûçeya “PKK dawî li têkoşîna çekdarî tîne” weşand.

DE MORGEN: Yek ji mezintirîn rojnameyên Belçîkayê De Morgenê jî cih da peyama Ocalan û bi ser nûçeya “Rêberê PKK’ê banga agirbestê kir” weşand û ragihand ku Ocalan di peyama xwe de gotiye: “Em êdî gihîştine wê astê ku divê êdî çek bêdeng bibin. Divê derbikevin derveyê sînor. Êdî dema naskirina siyasetê hatiye.”

AFP: Ajansa nûçeyan a frensî AFP’ê jî bi awayeke berfireh nûçe ji bo aboneyên xwe ragihand. AFP'ê nûçe bi awayê “Ocalan bi wesîleya cejna nû ya kurdan banga agirbestê û derketina ji derveyê sînorê Tirkiyeyê bang li PKK’ê kir” weşand û diyar kir ku dibe ev yek dawî li pevçûnên 29 salan bîne.

EL CEZÎRE: Kanala El Cezîreyê jî nûçe bi sernûçeya “Rêberê PKK’ê li Tirkiyeyê banga agirbestê kir” ragihand. Televîzyonê bi bîr xist ku demeke dirêj bû her kes li benda deklerasyona bidawîkirina şer bû û diyar kir ku ev deklerasyona agirbestê dê ji bo bidawîkirina şerê 30 salan pêngaveke girîng be.

LE MONDE: Rojnameya frensî Le Mondeyê jî nûçe bi sernavê “Rêberê PKK’ê Abdullah Ocalan li Tirkiyeyê banga agirbestê kir” ragihand  û wekî nûçeyeke lezgîn weşand.

LE FIGARO: Le Figaro jî, sernûçeya “Ocalan banga agirbestê kir” daxuyaniya Ocalan ragihand û diyar kir ku daxuyanî hêviyên aştiyê xurt kir.

GUARDIAN: Rojnameya Guardian a îngilîz jî daxuyanî bi sernûçeya “Ocalan agirbest ragihand” weşand. Di nûçeyê de ragihand ku PKK’ê di şerê 30 salan de pêngava kirîüîtî îro avêt û “agirbest” ragihand.

REUTERS: Ajanda nûçeyan a navneteweyî Reuters daxuyaniya Abdullah Ocalan wekî nûçeyeke “flaş” bi aboneyên xwe re parve kir û bal kişand ku Ocalan gotiye: “Li şûna pêvajoya berxwedana çekdarî, pêvajoya siyaseta demokratîk dest pê dike.”