MAXIME AZADÎ

Hevserokê mezintirîn partiya Rojavayê Kurdistanê PYD’ê Salih Muslim diyar kir ku Gassan Hitto yê ku ji aliyê Koalîsyona Neteweyî ya Sûriyeyê ve weke serokwezîr hatiye diyarkirin temsîla Kurdan nake.

Hevserokê Giştî yê Partiya Yekitiya Demokratîk (PYD) Salih Muslim ku ji ANF’ê re axivî, got: “Ew temsîla Kurdan nake. Tu têkiliya wî bi Kurdan re tune."

Koalîsyona Neteweyî ya Sûriyeyê roja 18’ê adarê li Stenbolê civînek li dar xist û Gassan Hittoyê ku bi eslê xwe Kurd e weke serokwezîrê demkî yê Sûriyeyê hilbijart. Hittoyê ku heta sala par li Teksasa Amerîkayê di şîrketeke telekomînîkasyonê de dixebit, dawiya sala 2012’ê hate Tirkiyeyê û tevlî refên muxalefeta Sûriyeyê bû.

Muslîm got: “Dibe ku bi eslê xwe Kurd be, ev ne tiştek girîng e. Ne Kurdek nas dike, ne jî bi Kurdî dizane û ne jî tu eleqeya wî bi siyaseta Kurd re tune ye.” Muslîm destnîşan kir ku ji bo çareserkirina lihevnekirina di nava komên muxalefetê de Hitto hatibe hilbijartin û bi bîr xist ku Kurd ji bo civînê nehatine vexwendin. Her wiha got: “Tu hevdîtin bi aliyê Kurdan re çênebû."

Hevserokê PYD’ê got: “Herhal ew Kurdekî li gorî pîvanên xwe dixwazin. Ew jî temsîla Kurdan nake.

PEYMANA DI NAVBERA ARTÊŞA AZAD Û YPG’Ê DE DIOME

Salih Muslim bi bîr xist ku piştî şerê 15 rojan ên li Serêkaniyê, roja 17’ê sibatê di navbera Artêşa Sûriyeya Azad û Yekîneyên Parastina Gel (YPG) de peymanek hate morkirin û got ku ev peyman didome. Li gorî vê peymanê her du aliyan li ser xalên weke; derketina komên çekdar ji bajêr, avakirina meclîseke sivîl, dewrkirina vê deriyê sînor bo meclîsa sivîl, avakirina rêbendên hevpar ên di navbera YPG û Artêşa Azad de, ji bo rizgarkirina bajarên din pêkanîna koordînasyona di navbera her du hêzan de.

Muslîm li ser madeya “koordînasyonê” jî agahî da. Hevserokê PYD’ê da zanîn ku ev madeya koordînasyonê tenê ji bo bajarên ku ji Kurd û Ereban pêk tê derbasdar e û got: "An ne em nikarin şervanan bişînin heta Şamê jî.” Muslîm binê wê yekê xet kir ku êdî hêzên çekdar tenê dikarin bi destûra hêzên Kurdan bikevin herêmên Kurdan.

"EM LI HESEKÊ Û QAMIŞLOYÊ PIR HESAS IN"

Hevserok Salih Muslîm piştrast kir ku heta niha 9 bajar di bin kontrola Kurdan de ne û got ku ewlekariya Qamişlo û Hesekê jî di destê Kurdan de ye, lê ew lli van her du herêmaên bi awayeke pir “hesas” tevdigerin.

Muslîm destnîşan kir ku li van her du bajaran taxên hêjmarek zêde ya Ereban lê hene, ev tax bi rejîmê re tevdigerin û got: “Em weke her demê ji ber pevçûnên Kurd-Ereban pir hesas tevdigerin. Ger em bi nunerên Ereban re li hev bikin, em ê bikarin di carekê de rejîmê biqewirînin. Em ditirsin ku gelek xwîn birije. Hesasiyeta me ji vê ye. Ne ku hêza me tune ye."

PÊVAJOYA LI TIRKIYEYÊ ME JÎ BANDOR DIKE

Hevserokê PYD’ê pêvajoya hevdîtinan a di navbera rayedarên dewleta Tirk û Rêberê Gelê Kurd Abdullah Ocalan de hatiye destpêkirin jî nirxand û got: “Em hevdîtinan bi erênî dibînin. Em hêvîdar in ku dewleta Tirk ciddî be.”

Muslîm da zanîn ku ev hevdîtin dê bandoreke “zêde” li Rojavayê Kurdistanê jî bike û got: "Kesên li dijî me derdikevin û li dijî me şer dikin fermanê ji Tirkiyeyê digirin. Ger Tirkiye dest ji vê dijminahiya xwe berde, dê beşek girîng a pirsgirêkên me çareser bibin. Jixwe aliyên dên ên Ereban me qebûl dikin."

Muslîm destnîşan kir ku bendewariya wan ji hukûmeta Tirk “ciddiyet” e û got: “Rejîma Tirk heta niha di pêvajoyên wiha de ciddî nebû, ji ber wê jî tirs û fikarên me jî hene. Em ji provakekirina pêvajoyê ditirsin. Lê ger lihevkirineke pêk were dê pir baş bibe.”

ANF