Amed
Komîsyona Ziman û Perwedehî ya KCD’ê peyamek sersaxiyê ji bo helbestvan û nivîskarê kurd Arjen Arî weşand û êşa malbatê parve kir.

Komîsyona Ziman û Perwedehî ya KCD’ê got; “Helbestvan û nivîskarê kurd, hezkiriyê zimanê kurdî Arjen ARÎ, piştî nexweşiya giran, bêwext ji nava me koç kir.”

Daxuyanî wiha didome; “Mirina her hunermendekî wekî damareke jiyana çanda gelekî qut bibe. Arjen jî ji wan kêm kesan bû ku tevahiya jiyana xwe li gor azadiya gelê kurd saz kiribû. Ew bi pênûsa xwe bûbû şervanê azadiya gelê xwe. Di demeke ku gelê kurd dihat înkarkirin, zimanê kurdî qedexe bû, wî bêrawestan bi kurdî nivîsî. Arjen di helbesta kurdî ya modern de bû navekî nemir. Ew li ser şopa Ehmedê Xanî, li ser şopa Cegerxwîn meşiya. Tehma zimanê kurdî bi helbestên xwe derxist ser rûpelên pirtûkan. Helbestên Arjen, hestên me yên mirovhezî, welatparêzî û berxwedanê gûr kir. Ji ber qedexekirin, zext û zorên li ser zimanê kurdî, wî biryar da ku tenê bi kurdî binivîse. Gotibû “min têkiliyên xwe ji zimanê tirkî qut kir.” Ew ne dijberê zimanê tirkî bû, wî wekî helwestekê biryareke wisa dabû.

Em bawerin dê ciwanên kurd pênûsa Arjen li erdê nehelin. Bila serê gelê kurd û malbatê sax be.”

Çirayê jî peyamek weşand

Komeleya Çirayê jî li ser Arjen Arî peyamek weşand û wisa got: "Arjen Arî, yek ji welatperwerên xwedî vîn û wijdanê bû. Ew, bi salan li hemberî zordestiya li ser gelê kurd; ziman, çand û hemû nîrxên wî bi helwestek pesindayî têkoşiya. Temenekî ku di her keliyekî wî de reng û awazên kurdî dagirtî bû jiya. Wî, berhemên gelek hêja diyarî helbest û zimanê kurdî kir. Lê mixabin yek ji stûnên zexm ên ziman û wêjeya kurdî; di temenê xwe yê berhemdar de ji nava me koç kir. Bila serê malbata wî gelê kurd sax be.