Diyarname
Îro bi merasimek ji bo "yekkirina pêşmergeyan" li dar ket û Pêşmerge wê li Başûr di bin banê Artêşê de bibin yek. Wê bibin nebin, dem wê nişan bide lê biryar hatiye girtin ku bibin yek. Kîjan pêşmerge? Pêşmergeyên YNK'ê û yên PDK'ê.

Di merasima vê xebatê de Serokê Herêma Kurdistana Federe Nêçîrvan Barzanî got, "Yekkirina li ser rêya dewletbûn û sazîbûnê de gaveke dîrokî ye."
Serokwezîrê Herêma Kurdistanê Mesrûr Barzanî jî got, "Îro ji bo Kurdistanê û ji bo Pêşmergeyan rojeke dîrokî ye."

Wezîrê Pêşmergeyan Şoreş Îsmaîl jî di merasimê de axivî û got, "Yekkirina Pêşmergeyan destkefta neteweyekê ye û em hemû pê serbilind in."
Îsmaîl sipasiya Serokê PDK'ê Mesûd Barzanî û Serokê YNK'ê Bafil Talebanî kir ku di vê pêvajoyê de piştgirî dane vê xebatê.

DÎROKA YEKKIRINA PÊŞMERGEYA
Di sala 1992'yan de li Başûr Parlemena Herêma Kurdistanê hate avakirin. Du partiyên sereke hebûn PDK û YNK. Yê herduyan jî pêşmergeyên wan hebûn. Tu demê ew hebûn yek.

PEYMANA WASHINGTONÊ
Di salên 90'î de her du partî gelek caran bi hev ketin. Pêşmergeyên her du aliyan êrîşê hev kirin û ji hev gelek kes kuştin. Di sala 1998'an de DYA'yê Serokê YNK'ê Celal Talabanî û Serokê PDK'ê Mesûd Barzanî anîn ba hev. Di bin pêyengiya Wezîra Karên Derve ya DYA'yê Madeleine Albright civînek li Washingtonê hat organîzekirin. Yek ji xala li hevkirina wê civînê jî yekkirina rêveberiya Pêşmergeyan bû. Lê nebû.

2003, PIŞTÎ SEDAM
Berî têkçûna dîktator Seda Huseyîn di sala 2003'yan de Zelmay Xelîlzad ku yek ji senatorên DYA'yê û ji partiya Bush bû, dîsa fermandariya DYA'yê ji Barzanî û Talabanî xwestin pêşmergeyan bikin yek. Her du rêberan daxuyanî dan ku dê Pêşmergeyan bikin yek, lê tenê li ser kaxiz ma. Di salên 2006-2007'an de hin lîwayên hevbeş hatin avakirin, lê ew wisa ma.

YEKÎNEYÊN 70 Û 80'Ê
Heta îro jî du yekîne hebûn; Yekîniya 70'ê ya YNK'ê, Yekîneya 80'ê ya PDK'ê bû. Heta îro meaşê wan cuda, butçeya wan cuda bû.
Piştî çeteyên DAIŞ'ê ya sala 2014'an, DYA'yê raste rast çek dan Pêşmergeyan û meseleya "Yek Pêşmerge" dîsa bû meseleya sereke.

JI 2022'YAN HETA 2026'AN
Di sala 2022'yan de peymanek di navbera Pentagonê û Wezareta Pêşmergeyan de hat îmzekirin. Armanc ew bû heta rezbera 2026'an her du yekîne bibin yek. Salên borî îdîayên ku DYA'yê wisa gotiğe derketin holê, "Hûn Pêşmergeyan nekin yek, emê butçeya ji bo Pêşmergeya betal bikin."
Û îro merasima yekkirina Pêşmergeyan li dar ket.
Rojên pêş dê çawa bin hê nediyar e, lê îro gaveke dîrok hat avêtin.

Foto ji dema merasima Yekkirina Pêşmergeyan...