Diyarname
Partiyên siyasî yên li Kobanî li ser biryara perwerdehiya bi zimanê kurdî daxuyaniyek nivîskî da.

Di daxuyaniyê de hat diyarkirin ku partiyên siyasî yên li Kobanî bi fikareke mezin biryara têkildarî perwerdehiya bi zimanê kurdî li dibistanên herêmê ku tenê di hefteyê de 3 wane û waneyek jî çalakî ye û wekî madeyeke hilbijartî tê dîtin, dişopînin. Partiyan got ku ev gav têra mafê perwerdehiya bi zimanê dayikê nake.

Partiyan got "Ew vê biryarê qebûl nakin, bi her awayî red dikin.

Di dewama daxuyaniyê de hat gotin ku zimanê kurdî ne madeyeke temamker e ku xwendekar dikare hilbijêre yan nexwîne û ne zimanekî biyanî li welatê xwe ye, lê zimanê dayikê, nasname, dîrok, çand û bîrdana civaka gelê kurd e. Dixayuniya partiyan wisa dom kir, "Çi siyaseta perwerdehiyê vê rastiyê paşguh bike yan jî cihê zimanê kurdî kêm bibîne dikare wekî gavekee ne ji bo avakirina siberoja Sûriyeya nû were dîtin, lê wekî siyaseta paşguhkirin û înkarê were dîtin."

Partiyan got, "Divê zimanê kurdî û mafên perwerdehiyê di destûrê de were naskirin" û wiha dom kirin, "Em bang li Wezareta Perwrdê û Fêrkirinê û aliyên eleqedar dikin ku demildest li vê biryarê vegerin, diyaloga cidî û berpirsiyane bi nûnerên ji civakê û eleqedarên perwerdê û fêrkirinê re pêk bînin, siyaseta perwerdehiyê ya adilane deynin. Parastina zimanê kurdî û mafên perwerdehiyê ne tê wateya kêmdîtina zimanê erebî yan jî mafên pêkhateyeke din li Sûriyeyê ye; berevajî misogeriya mafên zimanî û çandî ya tevahî Sûriyeyiyan e."
Partiyan di daxuyaniyê de got, "Sûriyeya nû bi zihniyeta berê û berdewaama siyasetên paşguhkirin û înkarê nayê avakirin" û wisa dawî lê anîn, "Bêyî edalet, hemwelatiya wekhev û rêzgirtina pirrengiya Sûriyeyî axaftina ji bo avakirina Sûriyeyê nabe."

Partiyên siyasî yên li Kobanî ku daxuyanî dane ev in:
- Partiya Yekitiya Demokratîk (PYD)
- Partiya Demoqrat a Kurdî ya Sûrî
- Partiya Yekitiya Demokrat a Kurd li Sûriyeyê (YEKITÎ)
- Partiya Demoqratî Pêşverû Kurd li Sûriyê
- Partiya Demoqrata Kurd li Sûriyê (El Partî)
- Partiya Çep a Kurd li Sûriyê
- Partiya Rêkeftina Demokrat a Kurdî ya Sûrî
- Partiya Sûriya Pêşerojê
- Tevgera Azadî ya Kurdistanî li Sûriyeyê
- Partiya Aştiya Demoqrat a Kurdistanê