Diyarname
Wezîrê Perwerdeyê yê Sûriyeyê Dr. Mihemed Ebdurehman Tirko îro li ser perwerdehiya bi kurdî biryareke nû îmze kir. Lê niha gelek pirs li holê ne. Pêşî ew biryar name:

- Armanca vê gavê parastina mafên çandî û zimanî û xurtkirina cihêrengiya çandî ye.

- Li gor xala duyem xwendekaran kurd dê heftane 3 dersên zimanê kurdî bibînin. Ev ders dê ligel zimanên erebî û îngilîzî werin dayîn û notên zimanê kurdî dê li ser nota giştî ya dawiya salê werin hesabkirin. Ligel vê dê heftane derseke çalakiyan jî bi zimanê kurdî bê dayîn.

- Wezaretê di vê daxuyaniyê de ragihandiye ku xwendekar dikarin di sala yekem de dersên civaknasî, dîrok, erdnîgarî û felsefeyê li gorî dilê xwe bi erebî an jî bi kurdî bixwînin. Lê ev mafê hilbijartinê tenê ji bo sala yekem a piştî vê biryarê ye.

- Xala sêyem jî li ser mamosteyan e. Ev daxuyanî dibêje ku kesên ku zanîngeh an jî peymangehên mamostetiyê qedandine û bi kurdî baş dizanin dikarin bibin mamoste. Di rewşên pêwîst de, kesên ku lîse qedandine û bi kurdî baş dizanin jî dikarin werin erkdarkirin.

Niha pirs ev in:
- Serdema perwerdehiyê ya sala 2026-27'an hê dest pê nekiriye. Ev daxuyaniya ku îro belav kirine ji bo îsal e jî, yan ji bo sala 2027-2028'an e? Li ser vê ne di daxuyaniyê de, ne jî wekî din tu agahî nîn in.

- Saziya Materyalan a girêdayî Rêveberiya Xweser meha borî eşkere kiribû ku çapkirina materyalan bi kurdî yên ji bo 2026-27'an temam kirine. Û ewê bi van dersê bidin.

- Di daxuyaniya wezaretê de nayê gotin ku xwendekarên kurd bi mecbûrî hefteyê vê 3 saetan dersê bibinin, yan  ev dê derseke hilbijartî be û tenê yên bixwazin dê bixwînin?

- Û pirsa dawî, rêveberên Rêveberiya Xweser wekî Mazlûm Ebdî, Îlham Ehmed û yên din di vî warî de çi dibêjin, hê tiştek negotine.

Wekî agahî; Serfermandarê HSD'ê Mazlum Ebdî di salvegera 100 Saliya Qamişloyê de roja 21'ê mehê gotibû "Zarokên kurd  wê bi zimanê dayikê bixwînin". Dîsa Ebdî di hevpeyvîna ligel Dilbixwîn Dara ya Rûdawê de jî hefteya borî gotibû, "Li Rojava ev 15 sal in kurdî bûye zimanê perwerdehiyê û heta zanîngehê heye. Ji ber vê nabe vegere wekî dersa hilbijartî. Ev ne mimkûn e." Li ser daxuyaniya nû ya îro Ebdî hê tiştek negotiye.

**

***

Li ser pêvajoyê çend nûçe û nivîsên eleqedar:

- Li Rojava çapkirina pirtûkên ji bo serdema 2026-27'an temam bû

- Îlham Ehmed: Emê li nav dewleta Sûriyeyê peywirê bigirin

- Ebdî li Şamê axivî: Ev roj wê bibe destpêka guhertineke rasteqîn a ji qadên şer ber bi qadên avakirinê ve

- Ebdî: Zarok wê bi zimanê xwe bixwînin

- Helîm Yûsiv: Gelo Rojava têkdiçe? 

- Helîm Yûsiv: Aliyên kurd çi dikin, wê çi bikin? (Gelo Rojava têkdiçe?)

- Cemil Oguz: Em bi anekdotan li meseleyê binêrin