Wan
Komeleya Wêjekar û Nivîskarên Kurd ên Serhedê (KURDÎWAR) bi beşdariya gelek kesî li Tûşbayê ya Wanê hat vekirin. Komele wê bike ku li Serhedê bibe sîwanek.

Di bin hevserokatiya Elif Gemicioglu Yaviç û Qahir Bateyî de, rêveberiyek ji 5 kesan pêk hatî komele ava kiriye. Pêşî yek ji rêveberên komeleyê Faysal Yacan axivî, dûre hevserokan ji bo mêvanan qala komeleyê kir.

'ARMANC EW E KOMELE BIBE SÎWANEK'
Hevseroka Komeleyê Elif Gemicioglu got, "Armanca me wêjekar û nivîskarên Serhedê di bin sîwaneke de kom bibin, hêzê bi din hev dû, çerxe ziman û wêjeya kurdî berfirehtir bikin me ev komele ava kiriye. Em li benda her jinek, ciwanek in. Em li benda hemû kurdan in."

'BI PIŞTGIRIYA WE EMÊ ZIMAN Û HUNER BIPARÊZIN'
Hevserokê Komeleyê Qahir Bateyî jî got, "Em şad û bextewar in ku saziyeke edebiyat, çand û folklora kurdî li bajarê Wanê vedikin. Wekî KurdîWar em dixwazin bibin wargehek ji bo edebiyata kurdî, ji bo çanda kurdî, hunera kurdî ku ji niha û pêde em bikaribin ziman, edebiyat, hunera kurdî hîn bêtir dewlemend bikin, biparêzin û pêş bixin. Piştgiriya gelê me di vir de girîng e. Piştgiriya we bo me hebe, hûn me bi tenê nehêlin, emê bikaribin vî zimanê dewlemend ku Îro nifşê nû bikar nayne, ew wêjeya devkî ya deryaya bê binî ye, îro bi mirina her pîrejinek, pîrek dibe bin gorê, emê bikaribin biparêzin."