Amed
Li Amedê saziyên ziman ji bo 21'ê Reşemî Roja Zimanê Zikmakê a Cîhanê bi diruşma “Statuya Kurdî perwerdehiya Kurdî” daxuyanî da çapemeniyê.
Daxuyanî li eywana Alî Emîrî ya Şaredariya Bajarê Mezin a Amedê bi beşdariya endamên saziyan û hevşaredarên navçeyên Amedê li dar ket. Daxuyanî bi kurmancî û kirmanckî hat dayîn.
Endama Komeleya Wêjekarên Kurd Stran Yaşar kirmanckî, mamosteyê zimanê kurdî Rifat Ronî kurmanciya wê xwend.
Va ne hin gotinên ji daxuyaniyê:
- Ziman hêmanê bingehîn ê netewebûnê ye. Mirov bi zimanê xwe dibin mirov gel û civak bi zimanê xwe dibin netewe.
- Gel û civak bi rêzgirtina ji nirx û rûmetên hev re, dikarin hezkirin, xweşbînî û hestên xwişk û biratiyê di navbera xwe de ava bikin, bi pêş bixin û bingeha aheng û pêkvejiyanê mayînde û mîsoger bikin, wekheviya zimanê dayikê jî, bi pirrengî, pirdengî pirçandî û pirzimaniyê saz bikin.
- 21'ê Reşemî wekî Roja Zimanê Zikmakî ya Cîhanê ji aliyê Rêxistina Çand, Ziman û Zanistê (Unesco) yê ve hatiye qebûlkirin. Di sedsala 21'emîn de, hîn jî li gelek welatên cîhanê gel û netewe, wekî gelê kurd ji bo çand, ziman û nasnameya xwe têkoşînê dimeşînin, berdêlên mezin didin
KURD DIJÎ PERGALA YEKPEREST TÊDIKOŞE
- Gelê kurd, zêdetirî sed salan e, li dijî pergala yekperest a ku li hemberî çand, ziman û nasnameya gelê kurd polîtîkayên înkar û tunekirinê dimeşîne, li ber xwe dide, daxwaza mafên xwe yên nasnameyî dike û bang li hemû gelên Kurdistan, Tirkiye û cîhanê dike ku têkoşîna xwe ya ji bo statu û mafên xwe yên zimanî xurttir bikin.
BI ‘STATUYA KURDÎ, PERWERDEHIYA KURDÎ’ XEBAT
- Em wekî saziyên zimanê kurdî, bi hest, helwest û hişmendiya parastin, pêşvebirin û bilindkirina qîmet û rûmeta zimanê kurdî, bi daxwazên xwe yên perwerdehiya bi zimanê dayîkê, em ê, bi şiara ‘Statuya Kurdî, Perwerdeya bi Kurdî’ xebatên xwe yên Zimanê Kurdî, yên di çarçoveya 21'ê Reşemiyê Roja Zimanê Zikmakî Ya Cîhanê de bimeşînin.
GELEK MEŞ Û ÇALAKÎ WÊ LI DAR BIKEVIN
- Emê gelek çalakiyan li dar bixin. Emê bi panel, meş, daxuyanî, nîşandana lîstikên şanoyê, fîlm û belgefîlman, nîşandana lîstikên şanoyê yên ji bo jinan û her wiha lîstikên şanoyê yên ji bo zarokan, şevbuhêrkên dengbêjan, bernameyên îmzekirina pirtûkên ku ji aliyê nivîskarên kurd ve hatine nivîsandin, li cihên navendî danîna standên bi daxawaza perwerdehiya zimanê kurdî, vekirina Parka Gulistana Zimanan, konserên pirzimanî, forum û belgedayînan, bi hevkariya saziyên ziman û çandê lidarxistina konserên pirzimanî, semînerên hişmendiya ziman ên ji bo malbatan, stand-up, bi pêşengiya Meclisa Zaravayê Kirmanckî, ji bo pêşîlêgirtina windabûna zaravayê kirmanckî, ji Rêxistina Çand, Ziman û Zanistê (Unesco) û Wezîrê Perwerdehiyê re şandina nameyan, kar xebat û têkoşîna xwe ya zimanê zikmakî berdewam bikin.
KURDÎ JI DIBISTANA SERETAYÎ HETA ZANÎNGEHÊ BILA BIBE ZIMANÊ PERWERDEHIYÊ
- Heta zimanê kurdî di Zagona Bingehîn de bê qebûlkirin emê têbikoşîn. Zimanê kurdî heya bi qanûnan were mîsogerkirin, bibe zimanê fermî û ji pêşdibistanê heta zanîngehê bibe zimanê perwerdehiyê, em ê têkoşîna xwe ya parastin, pêşvebirin û mîsogerkirina çand, ziman û nasnameya kurdî, ku nirxên bingehîn ên neteweyî yên gelê kurd in, bi biryardarî bimeşînin û xurtir bikin.
- Ji niha ve 21'ê Reşemî Roja Zimanê Zikmakî ya Cîhanê li gelê me yê dildar û dilsozê zimanê kurdî û hemû gelên bindest ên cîhanê, yên ku ji mafê perwerdehiya bi zimanê dayîkê bêpar in pîroz be.
***
Nûçeya Eleqedar:
- Ji bo 'Roja Zimanê Zikmakî' bernameyeke berfireh hat organîzekirin