Diyarname
15'emîn Festîvala Fîlman a Kîjan Mafên Mirovan? îsal di navbera 13-17'ê mehê de li Stenbolê li dar dikeve. Festîval îsal ji Tirkiye û welatên din 50 fîlmî pêşkêş dike. 

BÎRANÎNA HAKAN TOSUN
Di nav de çend jê bi kurdî ne. Her wiha belgefîlmkar Hakan Tosun ku hatibû kuştin di festîvalê de tê bibîranîn. Di beşa taybet ji bo Hakan Tosun de hem xebatên wî dê bêne nîşandayîn hem jî gotûbêj li ser bêne kirin.
Di vê beşê de belgefîlmên Hakan Tosun kişandibûn "Geldiler ve tapulu mallarımıza el koydular!" (2025, 7 dq), "İliç Altin Madeni" (2024, 20 dq), "Kaz Daglari Talanı: Ne Ugruna..." (2021, 30 dq), "Validebag Direnişi" (2014, 40 dq) jî wê bêne nîşandayîn.

FÎLMÊN BI KURDÎ
Bi temamî 6 fîlm hene ku bi kurdî ne yan jî beşek jê bi kurdî ye: "Xeyala Rojînê", "Sîtav", "Hey Hawar" "Otekî Kuşlar" (Çivîkên din), "Yenî Han" (Xana nû) û "Kardeş Turkuler".
"Xeyala Rojînê" (34 deqe): Fîlmê "Xeyala Rojînê" ji aliyê Serwa Aliveisy ve hatiye kişandin. Ji ber astengiyên biyolojik jin û mêrek ji bo bibin malbateke bi hêvî zarokek wekî weled digirin. Fîlm li ser hestê malbatek diçe û tê.
"Sîtav" (17 deqe): "Sîtav" fîlmê Dîlan Toftîk e. Di dema bûyerên li Sûra Amedê de fîlm li wir derbas dibe. Bêrîvana meraqdara kişandina fotoyan û girtina dîmenên vîdeoyê ye, jiyanê tomar dike. Lê Hêlîn dema xwe ligel pisîka xwe ya bi navê Nokê derbas dike. Bûyer dest pê dikin, gelê wir koç dike, rojek dema Bêrîvan û Hêlîn ji bo bavê xwe yê li Sûrê xwarinê dibin, pisîka wan winda dibe.
"Hey Hawar" (22 deqe): "Hey Hawar" belgefîlmê Caner Dara ye. Roja 20'ê tîrmeha 2015'an li Sirûcê di encama teqîna bombeyê de gelek kes dimirin yek ji wan jî Suleyman Aksu ye. Gora Aksu çend caran rastî êrîşê tê. Belgefîlm li ser vê yekê hatiye kişandin. Belgefîm di heman de demê de meseleya êrîşa li hemberî goran jî tîne rojevê.
"Otekî Kuşlar" (Çivîkên din, 20 deqe): Belgefîlmê "Oteki Kuşlar" ji aliyê Rozerîn Arya Şimşek ve hatiye kişandin. Belgefîlm li ser ziman û çanda zazayan (kirmanc) hatiye kişandi. Ew berê xwe dide ciwanan ka çiqas kirmancki bikar tînin.
"Yeni Han" (Xana nû, 52 deqe): Fîlmê "Yenî Han" ji aliyê derhêner Bingol Elmas ve hatiye kişandin û pirzimanî ye. Erebî, kurdî, rusî, tirkî, gelek ziman di belgefîlm de hene. Çima? Ji ber ku belgefîlm li Yenî Hanê, li cihê ku ji gelek welatan koçber lê ne û ji bo hêviyên nû ewraqên xwe dadigirin.
"Kardeş Turkuler" (108 deqe): Belgefîlmê "Kardeş Turkuler" ji aliyê Çayan Demirel û Ayşe Çetinbaş ve hatiye kişandin. Di belgefîlmî de bi ser koma Kardeş Turkuler de berê xwe dide 30 salên dawî yên Tirkiyeyê û çîroka çandî, polîtîk a serdema dawî nîşan dide.

GOTÛBÊJA LI SER GIRTIYAN
Di çarçoveya festîvalê de gelek gotûbêjên li ser mafên mirovan hene ku yek ji wan jî "Girtiyên Nexweş û Li Girtîgehê Keda Lênêrînê" ye. Komeleya Mafên Mirovan, Pisporên Xizmeta Civakî, Komeleya Civaka Sivil Di Pergala Ceza Înfazê de vê gotûbêjê bi rê ve dibin (15'ê mehê, saet 18.00, Postane)

TEMAŞEKIRIN BÊ PERE YE
Di festîvalê de temaşekirina fîlm û belgefîlman bê pere ye. Fîlm û belgefîlmên wê li Beyoguyê li Navenda Çanda Fransiz, Aynali Geçit, Postane û Muzeya Perayê, li Kadikoyê li TAK'ê, li USkudarê jî li Navenda Çanda Baglarbaşî têne nîşandayîn

Ji bo agahiyên zêdetir:
www.hihff.org/