HELEBCE
Li Helebce atolyeyek li ser nivîsîna senaryoyên filmên sînemayê hat lidarxistin. Beşdaran got; “Em dixwazin bi vê rêyê hunerê bikin wekî çandekê û di bajarê xwe de zêdetir pêş bixin.”

Rêveberiya Giştî ya Çand û Hunerê ya Helebceyê, bi hevkariya Sendîkaya Hunermendên Kurdistanê atolye daye dest pê kirin. Derhêner Şiwan Etûf li atolyeyê dersê dide.

Serokê Şaxa Helebce ya Sendîkaya Hunermendên Kurdistanê Mihemed Abdullah têkildarî atolyeyê ji bo Rojnewsê wiha got; “Ev çalakî ji aliyê Rêveberiya Giştî ya Çand û Hunerê ya Helebce û Sendîkaya Hunermendên Kurdistanê ve hatiye organîzekirin. 45 xwendekar beşdarî atolyeyê bûne. Em dixwazin bi vî rengî mirovan ava bikin ku bikaribin senaryoyên fîlman binivîsin. Bi vî rengî, em dikarin ji bo pêşerojê ciwanan fêrî nivîsandina senaryoyan bikin û wekî hunermend sûd ji wan bistînîn.”

Mihemed Abdullah ji bo xebateke wisa kêfxweşiya xwe anî ziman û got; “Em gelek kêfxweş in ku hejmareke girîng ji ciwanan beşdarî atolyeyê bûne. Xeyal û hezkirina wan a sînemayê heye û ew dixwazin nivîsandina senaryoyên fîlmên sînemayê fêr bibin. Emê van qursan pêş bixin da ku em bajarê xwe wisa lê bikin ku sînema lê  serdest be.”