Diyarname
Weşanşaneya Lîsê 6 pirtûkên helbesta bi hev re çap kirin û belav kirin. Ji van 3 heb çapa wan a yekem e, yên din çapên nû ne.
*
"ZENGEŞEV"
"Zengeşev" navê pirtûka helbestan a Îrfan Amîda a nû ye. Amîda ev zêdetirî 30 salan in berheman diafirîne; berî vê jî gelek pirtûk derxistibûn. Amîda di pirtûka 64 rûpelî ya nû de serpêhatiya helbestvaniya xasî xwe, bi vegotin û sembolên poetîkaya xwe didomîne. Di her pêlika helbestên xwe ên nû de bi şêwazekî dîtir rihê peyvan dide ber çavên xwendevanan.
Zengeşev, bi helbestên xem û xemgîniyên kûr, pêlên ji dem û wextên derbasbûyî, siya bavên dilkeser, dayikên her dilovan û bendewarê azadiyê, hechecîkên dûrî warên xwe...
Ew her çendî ji cîhaneke nasyar sembolan berpeyî me, xwendevanên xwe dike jî, Îrfan Amîda pira zemên a di navbera duh û îroya Kurdistanê de peyv bi peyv li bîra me dirêse.
Va ye parçeyek jê:
şermeke kevnar e niha çîrok
ev pêlek e
û ev pêlek e
Kurdistan peyvek e
*
"BÎYABAN"
"Bîyaban" navê pirtûka helbestan a Mîna Acer. Acer berî vê jî pirtûkek helbestan nivîsandibû. Di pirtûka nû ya 72 rûpelî de ew xwendevanan di nav kûrahîya hestên mirovahîyê de vedixwîne rêwîtîyeke lîrîk û dibe nav bîyabaneke hundirîn û li wir li şopa hestên wekî keser, bendewarî, wêranî û evînê digerîne.
Va ye parçeyek jê:
ey bîyaban bilindtir bike
bena navbera xwe û gerdûnê
navbera xwe û xwe
navbera xwe û wan
*
"FELAKET IM"
Felaket im pirtûka helbestan a Çayan Okuduci ye. Ev pirtûka wî ya diduyan e. Okuduci di pirtûka 72 rûpelî de bi awaz û nêzikatîya xwe, cihê xwe dîyar dike û dibe; “Ez li vir im.”
Pirtûka Felaket im, ne zimanê keder û qederê ye, lê zimanê serîhildanê û sewdayê ye. Di nav kolanên bajaran de, di nav şewateke bêbav de zîl daye û bi şikl û awaza xwe dertê hemberî her dilî û her hişî. Her helbestê, xwe bi helbesta piştî xwe temam kiriye. Gava helbest bi dawî dibin, tiştê ku tê ser zar û ziman, ar û agir e.
Va ye parçeyek jê:
buonasera delalê
ji araqa herî biçûk piçek bahoz û felaket
min zebeş jî kir paşila xwe
penêrê qerejdaxê jî heye
bila êvar bi ser te ve neçe
hê em ê herin daweta mitriban
3 PIRTÛKÊN LAL LALEŞ
Li aliyê din, ji bilî van 3 pirtûkên helbestan ên Lal Laleş bi çapên xwe yên sisêyan ji nû ve li ber desten xwendevan in.
"Matmayînên Ronya", "Deqên Qesas" û "Berbejna Rê" her sê pirtûkên Lal Laleş in ku çapa nû kirin.