Ali Bariş Kurt - Amed
Xwediyê Îmtîyazê û Midûrê Karên Nivîsaran ê berê yê rojnameya Azadiya Welat Vedat Kurşun serbest hat berdan. Kurşun di çarçoveya sererastkirina “taloqkirina sûcên propagandayê ya bi rêya çapemeniyê” de serbest hat berdan. Kurşun ji bo ANF’ê re axivî û got; “Bila bi serbestberdana kesek nebêjin wan azadiya ramanê aniye. Ew bi xwe distrên û lê vedigerînin."
Cezayeke rekor li rojnamegerê kurd Vedat Kurşun hatibû birîn û piştî 3 sal û 7 mehan di girtîgehê de ma, serbest hat berdan.
Kurşun ji bo ANF’ê wiha axivî; "Di 2009'an de li Stenbolê ez hatim girtin, nêzî 3 sal û 7 meh bûn di girtîgehê de bûm. Cezayek ku tu li deverên cîhanê nehatiye dîtin li min hate birîn, lê ji ber zextên raya giştî, ev ceza ji aliyê Dadgeha Bilind ve hat daxistin û bû 10 sal û 5 meh. Ji destpêkê ve bê edaletî hebû. AKP her tim behsa azadiya ramanê dike, lê ew bi xwe asteng dike."
Kurşun diyar kir ku piştî girtîgeha Amedê, sirgûnê Gîresûnê hatiye kirin û ev agahî da; “Piştî 15 rojan, dîsa heman 5’emîn Girtîgeha Cezayê Giran a Amedê ya ku ez dabûm girtin, biryara taloqkirina cezayê da. Cezayê min hatibû mîsogerkirin, lê piştî ku ev sererastkirina nû ez tehliye bûm."
Kurşun destnîşan kir ku her çendî ew serbest hatibe berdan jî ev yek nayê wê wateyê ku edalet pêk hatiye û got; “Jixwe girtina me bi xwe bêedaletî ye. Darizandin bi xwe bêhiqûqî ye. Em niha nikarin bawer bikin ku edalet pêk hatiye. Ew bi xwe distrên û lê vedigerînin.”
'EZ TEHLIYEKIRINÊ WEKÎ PÊNGAVA AZADIYÊ NABÎNIM
Vedat Kurşun bal kişand ku li Tirkiyeyê bi serbestberdana çend kesan azadiya çapemeniyê pêk nayê û got; “Azadiya çapemeniyê bi kesekî re sînordar nîn e û bi serbestberdana kesekî nabe. Ger hemû kesên di girtîgehan de ji ber ramanên xwe hatine giritn serbest hatin berdan, wê demê mirov dikare bêje hewayeke azadiyê heye. Heta niha jî nêzî 100 hempîşe û hevalên me girtî ne. Cezayên giran ji bo wan tên xwestin."
'EZ Ê SÛCÊN XWE YÊN BERÊ BERDEWAM BIKIM!'
Kurşun destnîşan kir ku ew ê xebatên xwe yên berê bidomîne û got; “Di 3 sal û 7 mehan de min hewl da ku ez xwe zêdetir di pîşeyê xwe de pêş bixim. Ji ber ku ez ê bersiva herî baş bi pîşeyê xwe bidim. Em ê hewl bidin ku bi pîşeyê xwe bersivê bidin zilma AKP’ê û pêkanînên darazê yên li hemberî me. Ger bi gotina wan tiştê em dikin sûc be, em ê sûcê xwe bidomînin. Ez ê ji cihê lê mabûm bidomînin. "