Diyarname
Komîsyonê Ziwan û Kulturî yê DEM Partî qeybî rocê merdişê rewşenbîr û ziwanzan Celadet Alî Bedir-xanî daxuyanî kerde vila.
Daxuyanî bi eno awa ya:
"Ser koçê peynî yê ziwannas, nuştox, rojnameger, sîyasetmedar, kedkar û kulturê Kurdkî, Celadet Alî Bedirxanî ra 73 serrî vîyartî. Ma serrgêra 73ine ya xatirwaştişê ey de Celadet Alî Bedirxanî bi hurmet û bi minet yad kenê.
Celadet Alî Bedirxan demê ke 15ê Temmuza 1951î de Şam de xatir cuya ra waşt, peynîya xo de mîrasêkî têkoşînî, xebatê zaf biqiymetî veradayî. Cuya Celadet Alî Bedirxanî, bi têkoşîn û xoverdayîşêko gird û mîyanê surgunî de vîyart. Cuya ey parçeyêka tarîxê şarê Kurd a û têkoşînê azadîya şarê Kurd de nimûneyêko ercîya yo. Kalê Celadet Alî Bedirxanî Mîrê Mîrektîya Cizîra Botan Mîr Bedirxan, seba ke polîtîkayanê merkezbîyayîşî yê dewleta Osmanî qebul nêkerd û seba azadî û heqanê Kurdan xebitîya welatê xo ra ame sirgûnkerdiş. Coka Celadet Alî Bedirxan surgunî de, 26ê Nîsana serra 1893î de Stenbolî de maya xo ra bi. Celadet Alî Bedirxan Stenbolî ra heta Ewropayî û Ewropayî ra heta Şamî surgunî de cuya la belê her tim seba ziwan û kulturê Kurdkî, seba azadîya neteweya Kurd mîyanê keftûleftêko gird de bî. Celadet Alî Bedirxan hem warê ziwannasî û kulturî de, hem zî warê xebatanê sîyasî de rolêko tarîxî kay kerd. Her tim mîyanê xebat û têkoşînî de bi. 15ê Gulana 1932yî de Kovara Haware vet û na kovare seba neteweya Kurd bî gamêka tarîxî ya ziwan û edebîyatî. Celadet Alî Bedirxan û embazanê ey Haware de îlhamêko gird da cigêrayox û xebatkaranê ziwan û kulturê Kurdkî. Kovara Haware seba Kurdan bî sey dibistanêk û zanîngehêk û nuştoxanê sey Kamiran Alî Bedirxan, Rewşen Bedirxan, Osman Sebrî, Nûredîn Zaza, Qedrîcan, Cegerxwîn vet werte. Celadet Alî Bedirxan, temamê cuya xo de seba standardîzasyonê ziwanê Kurdkî têkoşîn da. O, daneranê Alfabeya Latînî yê ra yew o ke na game tarîxê ziwanê Kurdkî de şoreşêko gird o.
Celadet Alî Bedirxan 15ê Temmuza 1951î de Şamî de koçê xo yê peynî kerd. Demê ke ey koçê xo yê peynî kerd hîna 58 serra bî. Ey, mîyanê 58 serran de zafêr xizmetê muhîmî, tarîxî û ercîyayî şarê xo ra verada. Şîretanê ke ey ser muhîmîya Kurdkî şarê xo rê kerd hema zî goşanê ma de yê. No mîraso ke ey ma rê verada ma do biresnê daraxêke û azadîya ziwanê xo bi dest bifinê."