Diyarname
Kovara LEWerger bi hejmara xwe ya 6'an a gulan, pûşper, tîrmeh û gelawêja 2024'an li pêşberî xwendevanên xwe ye."
Kovara LEWerger li ser wergera helbestan û wergerên aîdê helbestan weşana xwe didomîne. Di vî warî de roleke girîng tîne cih ku niha di sala xwe ya sisêyan de ye.
Kovar di bin rêberiya Yeqîn h., Miradê Miradan û Berfîn Huseynî de weşana xwe didomîne. Edîtoriya kovarê gotiye, "Ji we ve jî eyan e ku heya niha ji dehan zimanan wergerên bi dehan nivîskar û helbest karan bi destê ewledên kurd bûne milkê zimanê me" û wisa dom kiriye; "Aşkere ye ku ewledên kurd êdî  xwediyê awirvedan û werbêjiyeke têra xwe zexm û nişmîtir in. Îro û êdî xort û zarokên kurdan ji do çêtir dikarin ji wêjeya cihanê tekstên baş bi wergerên rast, pak û paqij ji çavkaniyên resen bixwînin, xwe pê bi pêş ve bibin û li hawirdora xwe belav bikin. Helbet ev ewledên kurd ne xîretkêşên yekem in ku vî karî dikin, lê û belê! em dikarin bêjin ku di roja îroyîn de bi ruh û can, li hemberî hemû xweşî û nexweşiyan, ew ji wan kes in ku 
tenê bi keda xwe û bi xemeke temam (û beyî qerepere!) di ta û mitaleya zimanê xwe de ne; bo wê seferî û seferber in..."
LEWergerê di vê hejmarê de jî ji gelek zimanan bi dehan helbest wergerandine û pêşkêşî helbesthezên kurdî kiriye. Îngilîzî, fransî, erebî, bulgarî, swêdî, ermenî, almanî, rusî, spanyolî, galisî hin ziman in ku helbest jê wergerandine û di vê hejmara nû de çapkirine.
Wekî notek din, kovara ku niha bi awayekî fermî di bin banê Pirtûkakurdî de derdikeve, ji niha û pêde heta demek dê di bin banê Weşanên Na de weşana xwe bidomîne.
Kovar ligel bajarên wekî Stenbol û îzmîrê, li gelek bajarên kurdan jî li cihên navendî dikare bê peydakirin.
Ji bo têkilî:
lewwerger@gmail.com