Diyarname

Bakur de zehf tay weşanê bi kirmanckî (zazakî) estê. Helbet pêdivî bi zewf weşanan esto. Enka weşanêke newî, bi namey "Zazakî World" veciya.

Zazakî World hetê Komeleya Ziwankomî ke navendey cê Amed de wa ra yena vetişî. Hûmara yewîne zey sibat 2024 veciya û gorey malûmatê ma edîtorê rojnamî Mehmed Olmezî ra girotî go aşme ra reyke rojname hûmara newî veco.

Zazakî World 8 rîpelî ya û 4 rengîn, 4 siya û sipê ya. Rîpelêke qeybî çî domananê, tede şiîrê, kayê domanan estê hamey hedrekerdiş. 

Vetişê rojnameyke çapkerdî hetê aborî ro zehmet o. La reyna zî înan bar giroto we û dest bi xebate kerdo. Eney ser Olmez vano, "Enka mabeynê xwu de ma aborî hel kenê. Xwu ra zêde çî niyo, bi embazanê zerîwazenê ma hel kenê. Ma do ser bixebetiyê qeybî fînansî, enka ma bi xwu hel kenê."

Edîtorî rojnamî, rojname kenê hedre la beyra qeybî her kesî akerde wo. Olmez ana vano, "Her kes eşkeno nişte bişrawo, şiîr beno, makale beno, hîkaye beno. Xwu ra rojname, rojnameyke kulturî yo."

Hûmara yewîne de rojnamî Dr. Nadîre G. Aldatmaze dir serê dersa weçînetîyê de qisey kerd û ene mesela kerda manşet. "Raporê atolyeyan", "Fûarê Dîyarbekirî yê Kirdan" henî xeberê bîne ke rojname de hamey vilakerdişî.

Niştey edîtorî de serê armancê rojnamî de ana hamey vatişî, "Ma wazenê û hewl danê ke Zazakî World bibo çimeyekê nuşteyan û xeylê nuştoxanê newiyan biresnê."