DiyarName.Com

Cemil Oguz

Ji bo weşanên ser taxiz çap dibin salek zehmet derbas bû. Wekî salên borî îsal jî me berê xwe da kovarên çapkirî ka kîjan weşana xwe didomîne, kîjan rawestiye, kîjanê çend heb derxistin...

Ji yên nû kovara 'Sûretgraf' îsal yekem car derket. Ji yên herî kevn ku kovara Nûbiharê ye ketiye 31 saliya xwe û bi awayekî bi pergal weşana xwe didomîne. Li ser hiqûqê, li ser çîrokê, helbestê, folklorê, derûniyê kovarên kurdî hene. Îsal 14 kovar ketine nava lîsteya me, par 19 kovaran di lîsteyê de cih girtibû. Ji kovaran hemû bi kurmancî tenê didu (Vate û Şewçila) bi kirmancî/zazakî ne.
Va ye lîsteya kovarên bi kurdî yên 2023'yan:

DESTAR

Kovara Destarê sala 2021'ê de dest bi weşanê kiribû. Par bi îstîkrar derketibû her sê mehan carek lê îsal tenê hejmarek derxist. Ew jî di serê meha sermaweza 2023'yan de derket.

DILOP

Kovara Dilopê bi kurdî û tirkî ye. Dilop du mehan carek derdikeve. Kovarê îsal havînê derneket loma jî tenê 3 hejmar derxistin. Di destpêka salê de du hejmar (hejmara 29 û 30)derxistin, havîn vala çû û hejmara 31'ê wekî sermawez-berfanbar derxist.

FOLKLORA ME

Kovara Folklora Me di bin banê Weqfa Mezopotamyayê de li ser folklorê weşanê dike. Kovar 3 mehane ye lê her sê mehan carek derneketiye. Par (2022) hejmara 12'yan ji bo mehên pûşper, tîrmeh û gelawêjê derxistibû, îsal jî tenê hejmarek derxistiye. Kovarê hejmara xwe ya 13'yan vê payîzê derxist. Yanê îsal tenê hejmarek derxistiye.

GOLIK

Kovara Golik kovareke qerfî ye. Piranişa xêzkarên wê li girtîgehan in. Îsal hejmara xwe ya 20'an wekî hejmara sermawez-berfanbar-rêbendan (2022-2023) derxistiye, hejmara 21'ê jî wekî avrêl-gulan dernexistiye.

KURDEÇÎROK

Kovara Kurdeçîrok kovareke ku li ser çîrokê weşanê dike. Par tenê hejmarek, hejmara 4'an derxistibû. Di sala 2023'yan de jî tenê hejmarek derxistiye: Hejmara 5'an. Kovarê wekî payîz-zivîstan hejmara xwe ya nû pêşkêşî xwendevanan kir.

‘KURT TARÎHÎ’

Kovara “Kurt Tarîhî” (Dîroka Kurdan) bi tirkî dest bi weşanê kir, paşê hin nivîsên kurdî jî lê zêde kirin, niha piranî tirkî be jî bi vî awayî weşana xwe didomîne. Kovara ku di bin banê Weqfa Îsmaîl Beşîkçî de derdikeve îsal tenê hejmarek derxistiye: Hejmara 51'ê.

Kovar wekî sêmehane ye lê îsal tenê hejmara meha rêbendan-reşemî-adarê derxistiye.

LEWERGER

Kovara LEWerger bi taybetî li ser wergera helbestê weşana xwe dike. Kovarê par dest bi weşanê kiribû, îsal ket sala xwe ya diduyan. Kovara ku çar mehan carek derdikeve îsal 3 hejmarên xwe derxistin: Meha 1'ê, meha 5'an û serê meha 9'an. Bi vî awayî LEWerger îsal her demê di dema xwe de derketiye.

NA AKADEMÎ

Kovara akademîk Nûbihar Akademî ji aliyê Nûbiharê ve tê derxistin. Kovara ku nivîsên akademîk belav dike şeş mehan carek derdikeve. Li gor peryoda xwe, îsal du hejmarên xwe, hejmara 18 û 19'an derxist.

NÛBIHAR

Kovara Nûbiharê her sê mehan carek derdikeve. Carinan hejmarên wê hinek derengî derên jî lê bi pergal her sê mehan carek derdikeve. Îsal hejmara 162'yê ya zivistana 2023'yan û paşê hejmarên 163, 164 û 165'an pêşkêşî xwendevanên xwe kir.

PHILOSOPHIA

Kovara Philosophia di bin banê Weşanxaneya Na de derdikeve. Kovara ku gotiye "çar mehan carek dertê" îsal tenê hejmarek derxistiye; hejmara 4'an ya meha rêbendan-reşemî-adar.

PSYCHOLOGY KURDÎ

Kovara Psychology Kurdî kovareke derûnînasiyê ye çar mehan carek di bin banê Weşanên Avestayê de derdikeve. Kovarê îsal hejmarên xe yên 15, 16 û 17'ê derxistin. Yanê her çar mehan carek hejmara xwe gihand ber destên xwendevanan.

SÛRETGRAF

Kovara Sûretgraf di bin banê Weşanên Avestayê de îsal dest bi weşanê kir. Kovara ku li ser fotografiyê ye hejmara xwe ya yekem vê zivistan-biharê pêşkêş kir. Hejmara wê ya diduyan wekî payîz-zivistan hat belavkirin.

ŞEWÇILA

Kovara Şewçila bi kirmanckî (zazakî) ye. Kovara ku par payîzê bi hejmara xwe ya 17'an piştî navberek carek din dest bi weşanê kiribû, îsal jî derket pêşberî xwendevanan. Şewçila 18 zivistana 2023'yan, ya 19'an biharê û ya 20'î havînê derket. Heta ev nûçe hate amadekirin îsal 3 hejmar belav kiribû.

VATE

Kovara Vate bi kirmanckî (zazakî) sê mehan carek derdikeve. Grûba Vate kovarê amade dike û sê mehan carek derdikeve.

Kovarê vê zivîstanê hejmara 75'an, biharê hejmara 76'an û havînê jî hejmara 77'an pêşkêş kir.

YÊN KU PAR DERKETIN ÎSAL DERNEKETIN

Di nav lîsteya me ya 2022'yan de kovara "Folklor û Ziman" hebû ku di bin banê Weqfa Mezopotamyayê de derdiket lê îsal qet derneket. Kovara Folklor û Ziman kovarek akademîk bû.

Kovara li ser hiqûqê Dadistan par du hejmar derketibû, îsal qet derneket.

Kovara "Bar" kovareke helbestê bû. Par hejmara 6'an (sermawez 2022) derxist lê îsal qet derneket.

“Dîalog” kovareke bi kurdî ye ya li ser Şanoyê par di meha adarê de hejmarek derxistibû, paşê dewam nekir.

Kovara "Psyche-Mezg" bi kirmanckî (zazakî) li ser pîsîkolojiyê derdiket, par hejmara diduyan wekî hejmara bihar-havîn 2022 derxistibû, îsal qet dernexist.

Kovara Zarema piştî demek dirêj par hejmarek derxistibû, lê paşê ragihadibû êdî dê wekî kaxiz çap nebe û îsal tu guherîn çênebû, careke din çap nebû.

Kovara Zendê ku ji aliyê Enstîtuya Kurdî ya Stenbolê ve dihat derxistin par hejmara xwe ya 29'an derxistibû, îsal qet derneket.

***

*Têbinî:

- Me kovar li gor rêza alfabetîk rêz kirin.

- Kovarên bi latînî yên li Bakur derdikevin di nav vê lîsteyê de cih girtine.

- Kovarên bi kurdî yên ku me ji bîr kiribin hebin, haya me pê bixin emê lê zêde bikin.

Bi ser twetter, facebook re dikarin peyamê bo me bişînin. Dikarin bi ser van mailan re jî agahî bidin me: diyarname@diyarname.com cemilo@diyarname.com

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

***

Nûçeyên Salê yên 2023'yan:

- 2023: Yên ku xatir xwestine

- 2023: Lîstikvanê herî zêde gol avêtiye: Ronaldo

- 2023: Hin nûçeyên derketine pêş

- 2023: 10 Fîlmên herî zêde pere kar kirine

- 2023: Di Googleê de peyvên herî zêde lê hatine gerîn

- 2023: Va ne rêzefîlmên herî serketî

- 2023: 100 pirtûkên sereke

- 2023: Hejmara xwendekarên dersa kurdî hilbijartine diyar bû

- 2023: Li gor NYT'yê 10 pirtûkên derketine pêş