Cemil Oguz

Festîvala Fîlman a Sûc û Cezayê îsal 13'emîn car li dar dikeve. Bernameya festîvalê eşkera bû: Gelek fîlm û belgefîlmên li ser edelatê hene.

Di serî de li Tirkiyeyê li hemû dinyayê mijara edaletê meseleya nîqaşê ye. Ev mijar çiqas girîng be jî her welat li gor xwe şikil dide edaletê û di encamê de yan edalet, yan jî bê edaletî dertê holê. Niha "Festîvala Sûc û Cezayê" fîlmên li ser edelatê carek din pêşkêşî temaşevanan dike. Diruşma festîvalê "Ji bo her kesî edelat" e.

'MIJARA BINGEHÎN EDALET E'

Li Metrohanê danasîna bernameya festîvalê li dar ket. Serokê Festîvalê Prof. Dr. Adem Sozeri, dîrektora festîvalê Prof. Dr. Bengî Semercî, yek ji şêwirmendên festîvalê Levent Erdem û yek ji endamên juriya îsal Selen Ozturk beşdar bûn.

Prof. Adem Sozerî got, "Em mijarên girîng digirin dest lê mijara me ya bingehîn edalet e" û paşê qala "Bernameya Akademîk" a festîvalê kir, "Mijara me ya em li ser bisekinin 'Azadiya Ramanê' ye. Dema me li ser vê lêkolîn kir me dît ku heta niha ne tenê li welatê me li gelek welatan di vî warî de pirsgirêk derketine. Di nîqaşa azadiya ramanê de emê li ser azadiya ramanê, rexne, sînorên azadiyê li ku dest pê dikin, li ku bi dawî dibin nîqaş bikin. Niha tora civakî heye emê di vê çarçoveyê de jî mijarê bigirin dest."

BI DEHAN FÎLM Û BELGEFÎLM HENE

Paşê dîrektora festîvalê Prof. Dr. Semercî li ser bernameya festîvala îsal sekinî. Festîvala îsal di navbera 17-23'yê sermawezê de li Stenbolê li dar dikeve. Li Beyogluyê li Sînemaya Atlas, Sînemaya Beyoglu û li Kadikoy jî li Sînemaya Kadikoy dê fîlm bêne nîşandayîn.

Di fîlmên metrajdirêj de Pêşbaziya Xelata Mêzîna Zêrîn hene. Di vê çarçoveyê de 2 fîlm ji Tirkiyeyê bi giştî 9 fîlm hene ku ev hemû li Stenbolê yekemîn car têne nîşandayîn. Fîlmên bi ser bikeve dê Xelata Mêzîna Zêrîn Bigire.

Di warê Pêşbaziya Xwendekaran, Pêşbaziya Kurtefîlman û Belgefîlman de jî dê berhemên serketî bêne xelatkirin.

XELATÊN RÛMETÊ DIDIN 4 KESAN

Festîval bi nîşandayîna fîlmê "After The Fire" dê dêst pê bike û di şeva destpêkirinê de xelatên rûmetên jî dê bêne dayîn. Xelata Rûmetê ya Akademî dê bidin Ionna Kuçuradi, Xelata Rûmetê ya Sînemayê bidin Ayşenil Şamlioglu, Xelata keda ji bo sînemayê jî dê bidin Alin Taşçiyan û Huseyin Ozşahin.

'DÎWAR'Ê YILMAZ GUNEY

Festîval îsal ji bo salvegera fîlman du fîlmên klasîk nîşan dide. Fîlmên Yilmaz Guney ê bi navê "Dîwar" tam 40 sal berê hatiye kişandin. Di vê 40 saliya fîlmî de fîlm bi kopyayeke nûkirî li fesTîvalê derdikeve pêşberî temaşevanan. Dîsa fîlmê Atif Yilmaz ê bi navê "Gece, Melek ve Bizim Çocuklar" ji bo 30 saliya wî tê nîşandayîn.

Fîlmê derhêner Noora Niasari ê bi navê "Shayda" dê wekî fîlmê dawî yê festîvalê bê nîşandayîn.

ATOLYE Û PANEL

Di festîvalê de ligel "Bernameya Akademîk" ku li ser edaletê dê nîqaş Çêbe, gelek atolye û panelên li ser sînema, belgefîlm, lîstikvanî jî hene. Ev bernameyên ku bê pere ne, berî destpêkê ji ser malperê de navqeydkirin mecbûrî ye.