Amed
Aramê Tîgran li Amedê derket ser dikê, strana "Rojbaş Diyarbekir" got û 'Min bêriya te kiriye' bi ser de zêde kir.
8'emîn Festîvala Çand û Hunerê ya Amedê ku di hefteyekê de şano, konser, pêşangeh, fîlm nîşan da, sempozyûn li dar xist bi konsereke mezin bi dawî bû. Di konsera dawî ya festîvalê de Aheng (Zelal, Nurcan û Meral), Koma Wetan û Aramê Tîgran derketin ser dikê, kela dilê temaşevanan mest kirin û bi vî awayî festîval bi dawî bû.
Ji bajarên derdorê jî gel bi erebeyên şaredariyê hatin heta Salona Daweta ya Ava a li Diclekent û guh dan Aramê Tîgran.
Di nav temaşevanan da endama Parlemena Ewropayê ya kurd Feleknas Ûca, Seroka Giştî ya DTP'ê Emine Ayna, mebûsên DTP'ê Gultan Kişanak, Selahattin Demirtaş, Ozdal Uçer, mebûsên DEP'ê yên berê Leyla Zana, Hatip Dicle, Selim Sadak, şaredarên din, endamên saziyên sivîl, rêveberên DTP'ê jî amade bûn.
Şeva ku pêşkêşvaniya wê Murat Batgi û Ferida Aslan kir de dik bi rengên kesk, sor, zer û mor hatibû xemilandin. Serokê DTP'a Amedê Nejdet Atalay derket ser dikê û got: "Pêdiviya me bi huner, siyaset, eşk, muzîkê heye. Lê herî zêde pêdiviya me bi aştî û azadiyê heye."
Dûre Feleknas Ûca axivî: "Ez li Stenbolê beşdarî mîtînga Bes e ji bo pirsgirêka kurd çareseriyeke demokratîk bûm. Bi hezaran kesî got êdî bes e. Ji Kadikoy min ji we re silav anîn."
Ûca bang li serokwezîr jî kir û got; "Hûn pirsgirêka kurd çareser nekin bi paketên aboriyê çareser nabe."
Piştre Zelal, Nurcan û Meral ku wan koma Aheng saz kiriye derketin ser dikê stranên xwe pêşkêş kirin û gel coşandin. Bi taybetî di starana "Ez keç im" de her kesî şirîkiya vegotina stranê kir.
Bila ciwan guh bidin Ehmedê Xanî
Dûre Şaredarê Bajarê Mezin ê Amedê Osman Baydemîr derket ser dikê. Temaşevanan demek dirêj li çepikan da û diruşmê 'Amed bi te serbilind e' qîrandin.
Baydemîr bi gotina "Ez bi we serbilind im" dest bi axaftina xwe kir û got: "Me festîval diyarê Ehmedê Xanî kir. Xanî 300 sal berê gotiye 'Ger yekîtiya me çêbe, em xwedî li çand û zimanê xwe derkevin, em bi awayekî zanyar tevbigerin dê kes nikaribe hukum li me bike.' Bi taybetî bila ciwanên me guh bidin Xanî."
Baydemîr got ku ew dê her gav di xizmeta çand û ziman de be û ev 8 sal in bi lidarxistina festîvalan xizmetê ji bo ziman, çand û hunerê dikin. Osman Baydemîr wisa dawî li gotina xwe anî: "Ger hûn zimanê min girê bidin, hûn çand û nasnameyê min ji min bigirin û bibêjin 'em hemû dinyayê didin te', emê qebûl nekin. Jiyaneke bê nasname, bê çand bila ji bo me heram be."
Seroka Giştî ya DTP'ê Emine Ayna jî got ku 20 sal berê ne qelebalixeke wisa, li malan jî lê guhdarîkirina kaseteke bi kurdî qedexe bû û wiha berdewam kir: "Kurdan di van 20 salan de ji bo çand û zimanê xwe, ji bo bigihîjin azadiya xwe, ev ziman û çand di zagona bingehîn de bê qebûlkirin gelek bedel daye."
Piştî axaftinan Koma Mûnzûr ji albuma xwe ya nû bi kurdî û tirkî stranên xwe xwendin û dik teslîmê avakarê Koma Wetan Kerem Gerdenzerî kirin.Koma Rewşen jî şirîkatî bi Gerdenzerî re kir û hemûyan bi hev re strana "Sîne" gotin.
'Bilbil' li ser Sûrên Amedê xwe danî
Û kêliya ku her kes li bendê bû hat. Dik teslîmê Aramê Tîgran û cumbuşa wî kirin. Dik bi diruşm û çepikan hejiya, konfetî û meşaleyan ronahî da dikê; her der bû wekî cejnê.
Koroya Şaredariya Amedê jî bi Tîgran re derket ser dikê ji Koma Azad hunermend Farqîn û Şîlanê jî vokalîstî kirin.
Aramê Tîgran hesreta xwe anî ziman, dest bi strana "Bilbilo" kir û dûre strana "Rojbaş Diyarbekir" ku bi taybetî ji bo Amedê saz kiribû xwend. Stranan ku gotinên “Rojbaş Diyarbakîr / Me pir bêriya te kir / Em hatin te bibînîn / Te derî li me vekir” di nav xwe de dihundirîne dilê temaşevanan sot.
Mirovên navsere û yên mezintir bi hêsran guh dan Aramê Tîgran ku ji Radyoya Yêrîwanê guhdarî lê kiribûn û ciwanan jî bi hesteke cihê lê guhdarî kir. Ji şaneşîn û pencereyên avahiyên li der û dora qadê jî gel li çepikan dan.
Tîgran saetekê li ser dikê ma, bi performanseke ciwanane stranên xwe pêşkêş kir.
Dûre Şaredar Baydemîr û mebûsa berê Leyla Zana derketin ser dikê û kulîlk dan Tîgran.
Û amadekarên festîvalê heta saleke din xatir xwestin.
.jpg)
.jpg)
