Diyarname
Pirtûka bi navê ‘Ez ji te hez dikim, kurdî hîn dibim - Ich liebe dich, ich lerne Kurdisch ‘ bi kurdî û almanî derket. Pirtûka ku nivîskar Ciwan Tengezar amade kiriye ji Weşanên Dilopê derket.

Li Almanyayê gelek kurd hene ku zarokên wan bi kurdî nizanin, ji xwendin û nivîsandina kurdî dûr in. Ji bo van kurdan heta niha li Almanyayê gelek pirtûkên bi kurdî derketine lê çiqas eleqe dîtine meseleyeke din e. Niha pirtûkek din ji bo kurdên li Almanyayê li van pirtûkên ku li Almanyayê derketine zêde bû. Pirtûka bi navê “Ez ji te hez dikim, kurdî hîn dibim – Ich liebe dich, ich lerne Kurdisch” ji aliyê Ciwan Tengezar hatiye amadekirin û ji Weşanên Dilopê derket. Weşanên Dilop li Berlina Almanyayê weşana xwe didomîne. Pirtûk bi kurmancî wekî pirtûka dersê ya ji bo asta yekem û pêşketî hatiye amadekirin.

Tengezar ku di heman demê de di kursan de dersê jî dide, ji tecrûbeyên xwe ên dersan pirtûka xwe amade kiriye. Bi eşkerekirina rêziman, lîsteya lêker û dewlemendiya gencîneya peyvan a vê pirtûkê, xwendevan dikare bi hêsanî û serketî xwendin, axaftin û nivîsandina kurmancî hîn bibin.
Ciwan Tengezar li ser pirtûkê dibêje ku wî  pêdivî bi weşandina vê pirtûkê dît, da ku kursên wî herikbar û hêsantir bibin û ji aliyekî din ve jî pêdivî bi pirtûkên kurdî-almanî heye. Nivîskar Ciwan Tengezar wisa didomîne: “Piraniya beşderên kursê li Almanya hatine dinê û zimanê wan ê sereke/perwerdehiyê almanî ye. Loma pirtûk bi kurdî-almanî ye. Her çend pirtûk ji bo kesên almanîzan hatibe amade kirin jî, kesên kurdîzan jî dikarin jê sûd werbigirin û bi vî awayî dikarin almanî hîn bibin.”
Li ser xweseriya pirtûkê ji pirtûkên din ku heta niha derketine jî Tengezar wisa dibêje: “Pirtûkên li ber destan di hin mijaran de ne kûr û ne zelal bûn. Bi qasî ji destê min hat, ez li ser mijarên rêzimanê hûr bûm û bi tevî nimûne, min ev zelal kirin. Wekî mijara zayendê; mijara gîhanekê; daçek û hwd. Wekî ferhengoka mijaran; lîsteya lêkeran. Her wiha nebûna ferhengên kurmaciya bilind (kurmancî-almanî, almanî-kurmancî) bû sedema amadehiya pirtûkê.”
Her wiha Tengezar dibêje ku ew niha amadehiya ferhenga kurmacî-almanî/almanî-kurmancî dike û wisa dawî li gotina xwe tîne: “Ger ez hêz, derfet û destek bibînim, hêvîdar im li salên pêş, wê amade be, ku ji xwe ev pirtûk prototîpa ferhenga kurmancî-almanî ye.”

Ez ji te hez dikim, kurdî hîn dibim - Ich liebe dich, ich lerne Kurdisch / Ciwan Tengezar / 280 rûpel / Weşanên Dilop

Ji bo kesên bixwazin bi Ciwan Tengezar re têkiliyê deynin: ciwantengezar@yahoo.de