Diyarname
Yekem berhema pexşan a behdînî/kurmancî “Nan û Jiyan” a Mihemed Emîn Osman ji Weşanên Avestayê bi alfabeya Latînî derket. Pirtûka ku yekem car di sala 1970’ê de hatibû çapkirin niha bi transkriptekirina Çekdar Aryan hat weşandin.

“Nan û Jiyan” yek ji berhemên avangard / pêşeng ê kurdî / kurmancî ye. Li başûr3e Kurdistanê dema behsa edebiyat û rewşenbîriya kurmancî dibe, yek ji navên destpêkê ê ku tê bîra mirov Mihemed Emîn Osman e. “Nan û Jiyan”, berhema wî ya sereke ye û bi nav û deng e. Ev berhem yekem pexşana kurmancî ye ku li Başûr hatiye nivîsîn û guldesteyeke çîrokên şanoyê ne ku kartêkirina folklora kurdî li ser heye. Kitêba ku vêga çapa wê nemaye, yekem car di sala 1970’yan de hatibû çapkirin û di radyoya kurdî ya Bexdayê de hatibû xwendin. Tekstên ku taybetmendiyên devoka behdînî di nav xwe de dihewînin û me eleqa zimanê wê nekiriye belkî xwendina wê ji bo xwendevanê bakur zehmet be lê belê heman demê de dê ev bibe delîveyek ji bo naskirina vê devokê û vî nivîskarê hêja.

MIHEMED EMÎN OSMAN KÎ YE?
Nivîskar Mihemed Emîn Osman di sala 1927’an de li Dihokê hatiye dinê. Wî, xwendina seretayî li Dihokê, ya amadeyî jî li Misûlê xilas kiriye. Ew ji bo xwendina Zankoyê diçe Bexdayê û li wê derê Fakulta Îlahiyatê xilas dike. Osman demeke dirêj li Bexdayê  wekî fermanber dixebite. Di wê demê de li ser folklora kurdî xebatên girîng dike. Mihemed Emîn Osman di sala 2003’yan de wefat dike.
Berhemên wî:
- Nan û Jiyan, 1970
- Jiyan û Viyan, Çîrokên gelêrî, 1980
- Berhevkirina zimanê kurdî û Hind û Ewrupî, ziman, 1988
- Mem û Zîna Ehmedê Xanî, Şîrove, 1990
- Hesedil Hemze, Dîrok, bi zimanê erebî, 1990
- Senfoniya Sehmê, Gotar, serpêhatî
- Sit û Ferxe, Çîrokên zarokan, 2001

Nan û Jiyan / Mihemed Emîn Osman / Transkripsiyon: Çekdar Aryan / Pexşan / 80 rûpel