ENQERE
Hevserokê BDP'ê Selehattîn Demîrtaş, di koma BDP'ê ya Melîsê de axivî û li ser komkujiyên meha adarê rawestiya. Demîrtaş, bal kişand ser mirina 11 karkerên li Stenbolê û diyar kir ku, ev komkujî ye. Demîrtaş, bal kişand ser sîstema perwerehiyê û perwerdehiya zimanê zikmakî û diyar kir ku Kurd dersa hilbijêrî qebûl nakin.

Hevserokê Giştî yê BDP'ê Selahattîn Demîrtaş, di civîna koma BDP'ê de vê hefteyê li ser mijarên girîng rawestiya. Demîrtaş, sersaxî ji malbatên 11 karkerên li Esenşurta Stenbolê jiyana xwe ji dest dan xwest. Demîrtaş, anî ziman ku ev komkujî sûcê mirovahiyê ye û xwest hemû muxalefetên Tirkiyeyê li hemberî vê komkujiyê bibin yek û bertekên xwe bînin ziman. Demîrtaş, da zanîn heta hêzên muxalif nebin yek û li hemberî pergala karkerên jiyana xwe ji dest dan neçarî vê xebatê dikin tênekoşin dê yek bi yek di van çadiran de bişewitin. Demîrtaş, bilêv kir ku ger ew nebin yek û li hemberî vê pergalê tênekoşin dê vê mirinê heq bikin û xwest hemû hêzên demokratîk li hemberî van komkujiyan bêdeng nemînin.

'MEHA ADARÊ BÛYE MEHA KOMKUJIYAN'

Demîrtaş, da zanîn ku meha Adarê bi komkujiyan tê bibîranîn u di vê mehê de komkujiyan Qamişlo, Helepçe, Gazî pêk hatine. Demirtaş, sersaxî ji malbatên kesên di komkujiyan de jiyana xwe ji destan re xwest. Demîrtaş, da zanîn ku kujerên komkujiya Sêwasê ji wan re ma û hesap ji wan nehatiye pirsîn û wiha got: "Hesap ji kujeran nehatiye pirsîn û tu lêpirsin jî nayê kirin. Lê em divê em vê yekê qebûl nekin û heza xwe bikin yek."

'PARÊZRÊN AKP'Ê KUJERÊN SÊWASÊ DIPARÊZIN'

Demirtaş, bilêv kir ku parêzerên kujerên doza Sîwasê diparêzin endam û rêveberên AKP'ê ne û niha jî divê tu eleqeya me bi dozê tune ye. Demîrtaş bibîrxist ku AKP li hemberî doza Sêwase du rû tev digere û ji gotinên wê bawer nakin.

Demîrtaş, bilêv kir ku ji bo hesap ji kujerên komkujiyan pê pirsîn dê heta dawî têbikoşe û wiha axivî: "Hikûmet naxwaze der barê lêkolîn û ronîkirina bûyeran de xebat bê meşandin û kesên di nava hewldanan de tên binçavkirin û girtin. Hikûmetê niha medya daye pişta xwe û weki Devekuşu serê xwe xistiye bin paskê xwe û dibêje qey kes qirêjiya wan nabine.

‘3 MEH DI SER ROBOSKIYÊ RE DERBAZ BÛ, LÊ GEL JI BÎR NAKE'

Demîrtaş, da zanîn ku di ser komkujiya Roboskiye re 3 meh der bas kir, lê hêj kujer nehatin ditin û hesap nehat pirirsîn. Demîrtaş bilêv kir ku hikûmet dixwaze ser bûyerê bigire û bide ji bîr kirin, lê gel tu carî ji bîr nake û dê hesap bipirse û wiha pêde çû: "Zêdeyî 600 xwendekarên zanîngehê di girtîgehê dene û dê li aliyê din behsa parastina mafên xwendekaran bikin."

'LI ŞÛNA HESAP BIPIRSE ROJNAMEGERÊN TRAJEDIYA POZANTIYÊ RONÎ KIR GIRT'

Demîrtaş, helwesta hikûmetê ya li hemberî pekaninên Girtgeha Pozantiyê ji rexne kir û wiha got. "Li şûna berpirsiyarên pêkaninên Girtîgeha Pozantiye darizîne û ronî bike, dijberî vê yekê rojnamegerên ku pêkanînên Pozantiyê ronî kir avêt hepsê û dixwaze ser bûyerê bigirin. Lê bila baş zanibin ku em ji pêy vê dozê venagerin û me dê bişopînin. Teqez dê li dijî zulm û zordariyê rûmeta mirovahiye qezenç bike."

'DIVÊ FERASETA POLÎTÎKAYÊN PERWERDEHIYE BÊN GUHERTIN'

Demîrtaş, pergala 4+4+4 rexne kir û wiha berdewam kir: "Divê perwerdehiya olan li dibistana bê dîtin. An jî divê perwerdehiya tu olan neyê dîtin. Divê beri her tiştî pergal û hişmendiya perwerdehiyê bê guhertin. Ger ku pergal û feraset neyê guhertin 4+4+4 be dê çawa be 40+40+40 be dê çawa be? Tu tişt nayê guhertin. Divê berî her tiştî pergala perwerdehiyê, pirtûkên perwerdehiyê û rêziknameya perwerdehiyê bê guhertin. Divê ji nûve pergalek nû bê ava kirin. Ev pergal ji perwerdehiya demokratîk û pêşketî re xizmetê nake."

'JI BO EM BI ZIMANÊ ZIKMAKÎ BIAXIVIN DIVÊ EM PERWERDEHIYA TIRKÎ NEBÎNIN'

Demîrtaş, anî ziman ku heyetên dadgehan bi sedena ku siyasetmedaran bi zimanê tirkî perwerde dîtine û bi tirkî zanin destûr nadin ku bi zimanê zikmakî parastinê bikin û wiha lê zêde kir: "Dadgeh dibêjin ji ber we perwerdehiya zimanê tirkî dîtiye hûn nikarin parastina kurdî bikin. Divê bi tirkî parastinê bikin. Wê demê perwerdehiya tirkî li pêş pêşketina zimanê kurdî asteng e. Ji ber vê yekê jî ji mere dibêjin bi zimanê xwe perwerdehiyê bibînin. Ji bo em bi zimanê zikmakî parastinê bikin û biaxivin divê em bi zimanê tirkî perwerdehiyê nebînin û bi zimanê dayîkê perwerdehiyê bibînin. Yargitay dibêje ger ku te bi zimanê zikmakî perwerde nedîtibe tu nikare bi zimanê zikmakî parastinê bike. Wê demê em jî mafê perwerdehiya zimanê zikmakî dixwazin. Ger ku hûn pirsa kurd çi dixwazin wê demê divê hûn ji kurdan bipirsin. Ji sedî 90'ê kurdan mafê perwerdehiya zimanê zikmakî dixwazin” û diyar kir ku Kurd qebûl nakin ku zimanê Kurdî bibe dersa hilbijêrî.

***

Nûçeya eleqedar:

- Wezîr Dînçer: Kurdî dikare bibe dersa hilbijêr