Diyarname

Enstîtuya Kurdî ya Stenbolê îsal Xelata Ziman a Feqî Huseyîn Sagniç dide nivîskar  Mulazim Ozcan (bi navê xwe yê nivîskarî Miraz Ronî). Ozcan ji ber di Akademiya Siyasetê ya BDP’ê de ders dabû çend meh berê hat girtin û hê jî li girtîgehê ye.

Enstîtuya Kurdî ya Stenbolê ji sala 2005’an  ve li ser navê zimanzan û rêveberê Enstîtuyê Feqî Huseyn Sagniç Xelata Ziman dide. Sagniç ku di sala 2003’yan de wefat kir yek ji avakar û kedkarên Enstîtuya Kurdî ya Stenbolê bû zimanzan bû.

Desteya Rêveber a Enstîtuya Kurdî piştî nirxandinên li ser gelek berendaman,  ji ber ked û xebata wî ya bi salan û ji bo piştgiriya nivîskarên kurd ên girtî, nivîskar Miraz Ronî (Mulazim Ozcan) hejayî Xelata Ziman a Feqî Huseyn Sagniç dît.

Enstîtuya Kurdî ya Stenbolê her sal vê xelatê di salvegera Enstîtuyê de, di 18’ê avrêlê de dide. Îsal ji ber ku Enstîtuya Kurdî ya Stenbolê 20 sal li dû xwe pişt di 18’ê avrêlê de hem ji bo dayîna vê xelatê hem jî ji bo 20 salî dê merasimeke li dar bixe.

Mulazim Ozcan (Miraz Ronî) kî ye?

Mulazim Ozcan di sala 1966'an de li gundê Nîstê ya girêdalî Bedlîsê hatiye dinê. Dibistana seretayî li Norşîn û Tetwanê, ya navîn li Tetwanê û Lîse li Tetwan û Betlîsê qedandiye. Li Zanîngeha Anadoliyê beşa Îktîsadê xwendiye û belgeya karê hesabdariyê girtiye.

Ozcan di sala 1992'yan de di nav HEP'a (Halkin Emek Partisi - Partiya Kedê ya Ge) Norşînê de cih girt. Wî di nav DEHAP'ê de jî wekî damezrîner cih girt û demekê Serokatiya DEHAP'a Mêrsînê kir. Miraz Ronî di dema damezrandina NÇM Mersînê xebitî û li wê derê dersên zimanê kurdî da.

Mulazim Ozcan van salan dest bi nivîsê jî kir. Ew piştî ku hat Stenbolê, di sala 1998'an de di rêveberiya Enstîtuya Kurdî ya Stenbolê de cih girt. Ew gelek serdema û di vê serdema ku hat girtin de jî endamê rêveberiya Enstîtuyê bû.

 Ozcan di sala 2000'î li Zanîngeha Uppasalaya Swêdê beşdarî qursa zimanê kurdî bû û sertîfîka girt.

Miraz Ronî (Mulazim Ozcan) gelek caran li DGM'ê (Dadgehên Ewlekariya Dewletê) de bi awayekî fermî werêgeriya kurdî-tirkî kir. Heta niha ev xebatên wî gihîştin ber destên xwendevanan:
- Di Siya Dara Xaçê de Serhildan (Helbest, Weşanên Pêrî, Stenbol 1999)
- Pratik Kurtçe Konuşma Klavuzu (Tirkî-Kurdî), Mulazim Ozcan, (Gun Yayinlari, Stenbol 2002)
- Tesewira Xaniyê Fîlozof, H. Mem (Werger Miraz Ronî, Weşanên Enstîtuya Kurdî ya Stenbolê, Stenbol 2004)
- Keça Ardil, Cafer Şahîn (Wergêr Miraz Ronî, Weşanên M, Stenbol 2004)

Yên ku Xelata Ziman girtine

Îsal sala heştan e ku Enstîtu vê xelatê dide. Heta niha van kesan Xelata Zimanê Kurdî ya Feqî Huseyn Sagniç girtine.
2005: Ziman Zana Farqînî
2006: Nivîskar Malmîsanij
2007: Şaredarê Sûra Amedê Abdullah Demîrbaş
2008: Rojnameya Azadiya Welat
2009 Rewşenbîrê Ahmet Turk
2010 Helbestvan Kawa Nemir
2011 Siyasetmedar Hatîp Dîcle

Foto: Cemil Oguz